रोल्पा - पार्टी एकिकरणभन्दा अगाडिसम्म माओवादी केन्द्र रोल्पाका जिल्ला उपाध्यक्ष ऋषिराम रोकामगर रोल्पा नगरपालिका १० धवाङ पेवाका स्थायी बासिन्दा हुन्। ४५ वर्षीय ऋषि १ दिदी र ४ दाजुभाई मध्यका कान्छा सन्तान हुन्। हाल रोल्पा सदरमुकाम लिवाङ बजार नजिकै मेवाङमा बस्छन् उनी। दुई सन्तानका बाबु ऋषि २०४६ सालको जनआन्दोलनदेखि राजनीतिमा रहर गर्न थालेको बताउँछन्। २०५२ साल बाटै भूमिगत भएका उनको व्यक्तिगत जीवन एउटा कथा बनेर रहेको छ।
सदरमुकाम स्थित बालकल्याण माविबाट एसएलसी गरेका ऋषिले आइए पाल्पामा पढे। तर उतिर्ण गर्न पाएनन्। भूमिगत अवस्थामा संगठन, स्वास्थ्य विभाग हुदै लडाइमा भाग लिए। साना ठुला दर्जनौ लडाई लडेका र देखेका ऋषि ‘समाज परिवर्तन’का लागि माओवादीमा लागेको सुनाउँछन।
‘सुरुमा नबुझेरै लागियो। पछिल्लो समय भने दर्शनप्रति आकर्षित भइयो। ’ माओवादी आन्दोलन पछिल्लो समय सोचे अनुसारको नभएको स्वीकार गर्ने ऋषि पार्टी एकिकरणप्रति सन्तुष्ट छैनन्। ‘ठुलो दल भएर केही नहुँदो रहेछ। कांग्रेस, एमाले, माओवादी नै मिसिएर दल बनाए पनि गर्नु पर्ने नगरेपछि केही लाग्दो रहेनछ। ’ उनी भन्छन्, राजनीति छोडेको नभए पनि सक्रिय राजनीति नगर्ने उनले बताए। ‘झगडा नै नपरे पनि नेताले सोचेजस्तो नगरेपछि पार्टीसंगको नाता छुट्दैछ।’
