अमेरिकी राष्ट्रपति डोनाल्ड ट्रम्पले काश्मिर विवादबारे भारत र पाकिस्तानका प्रधानमन्त्रीसँग छुट्टा छुट्टै कुराकानी गरेका छन्।
राष्ट्रपति ट्रम्पले सामाजिक सञ्जाल ट्वीटर मार्फत् फोनमा दुवै देशका प्रधानमन्त्रीसँग आफूले कुरा गरेको बताए। उनले ट्वीटमा भनेका छन्, “मैले मेरा दुई असल साथी भारतीय प्रधानमन्त्री नरेन्द्र मोदी र पाकिस्तानका प्रधानमन्त्री इमरान खानसँग कुराकानी गरेको छु।”
व्यापार, रणनीतिक साझेदारी, भारत र पाकिस्तानको सहकार्यलगायतका विषयमा पनि कुराकानी भएको ट्रम्पले उल्लेख गरे। काश्मिरकाे अवस्था राम्रो नभएपनि वार्ता निकै सकारात्मक भएको राष्ट्रपति ट्रम्पले बताए।
यही अगस्ट ५ तारिखका दिन भारत सरकारले संविधानको धारा ३ सय ७० खारेज गरेर जम्मु–काश्मिरलाई दिएको विशेष अधिकार समाप्त गरेको थियो।
भारत सरकारले जम्मु–काश्मिरलाई केन्द्र शासित प्रदेश तथा जम्मु–काश्मिरबाट लद्दाख क्षेत्रलाई अलग गरी अर्को केन्द्र शासित प्रदेश बनाएको थियो। भारत सरकारको उक्त घोषणापछि भारत र पाकिस्तानकाबीचमा फेरि सम्बन्ध चिसिएको छ भने विश्व समुदायले पनि चासोका साथ हेरेको छ ।