बिएल संवाददाता
काठमाडौं
इलाम २ र बझाङ १(१) मा हुने उपनिर्वाचनकाे निर्वाचन कार्यतालिका स्वीकृत भएको छ।
निर्वाचन आयोगले साेमबार वैशाख १५ गते हुने उपनिर्वाचनकाे निर्वाचन कार्यतालिका स्वीकृत गरेकाे हाे।
स्वीकृत निर्वाचन कार्यतालिकाअनुसार फागुन १६ गतेदेखि मतदाता नामावली अद्यावधिक कार्यक्रम सञ्चालन गरी चैत्र २२ गते अन्तिम मतदाता नामावली प्रकाशन गरिनेछ।
सो उपनिर्वाचनमा भाग लिन चाहने राजनीतिक दल दर्ता गर्नको लागि फागुन २४ गते देखि ३० गतेसम्मको म्याद दिई सूचना प्रकाशन गरिनेछ।
आज स्वीकृत गरिएको कार्यतालिकाअनुसार चैत्र २२ गते मुख्य निर्वाचन अधिकृतको नियुक्ति र सोही दिन मुख्य निर्वाचन अधिकृतको कार्यालय स्थापना गरी चैत्र २४ गतेदेखि २७ गतेसम्म निर्वाचन अधिकृतको कार्यालयमा निर्वाचन कार्यक्रम सञ्चालन हुनेछ।
निर्वाचन कार्यक्रमअनुसार चैत्र २४ गते उम्मेदवारी दर्ता र चैत्र २७ गते उम्मेदवारको अन्तिम नामावली प्रकाशन गरी निर्वाचन चिन्ह वितरण गरिनेछ।
साथै २०८० चैत्र २८ गतेदेखि २०८१ वैशाख १२ गतेसम्म प्रचारप्रसारको अवधि रहनेछ। २०८१ वैशाख १५ गते बिहान ७ बजेदेखि बेलुका ५ बजेसम्म सम्बन्धित मतदान केन्द्रमा मतदान हुनेछ।
