माछा नै नभएको ठाउँमा ‘माछापोखरी’ देखाएर भ्रष्टाचार, पूर्वमन्त्रीसहित ८ विरुद्ध मुद्दा
अख्तियार दुरुपयोग अनुसन्धान आयोगले माछा नै नभएको ठाउँमा माछापोखरी देखाएर भ्रष्टाचार गरेको आरोपमा तत्कालीन मधेश प्रदेश आर्थिक मामिला तथा योजनामन्त्री विजय कुमारसहित ८ जनाविरुद्ध मुद्दा दायर गरेको छ। सर्लाहीस्थित सागरनाथ वन विकास परियोजनाको वन क्षेत्र अतिक्रमण गरी गैरकानुनी रूपमा माछापोखरी निर्माण गरिएको अभियोगमा आठ जनाविरुद्ध विशेष अदालतमा भ्रष्टाचार मुद्दा दायर गरेको हो। आयोगले ५६ करोड ७१ लाख रुपैयाँभन्दा बढीको बिगो दाबी गर्दै संलग्नहरूलाई कैद, जरिवाना र विगो असुलको माग गर्दै मुद्दा पेस गरेको हो। अख्तियारका अनुसार बागमती नगरपालिका वडा नं. ४ र १२ मा सागरनाथ वन विकास परियोजनाको मुर्तिया वन क्षेत्र अतिक्रमण गरी ढुंगा, गिट्टी, बालुवा तथा माटो जथाभावी उत्खनन गरिएको र त्यसपछि माछापोखरी निर्माणका नाममा संघीय तथा प्रदेश सरकारको करोडौं रकम खर्च गरिएको उल्लेख गरिएको छ।
बिएल संवाददाता - काठमाडौं
