राष्ट्रिय स्वतन्त्र पार्टी (रास्वपा) का सभापति एवं गृहमन्त्री रवि लामिछानेले नेपालमा आम जनता र राजनीतिक दलका नेताहरुको प्राथमिकता एउटै विषयमा नभएको बताएका छन्।

काठमाडौँकाे भृकुटीमण्डपस्थित राष्ट्रियसभा गृहमा आइतबारदेखि सुरू भएकाे नेकपा (एकीकृत समाजवादी) काे दशाैँ राष्ट्रिय महाधिवेशनकाे उद्घाटन समारोहलाई सम्बाेधन गर्दै उनले यस्ताे बताएका हुन्।

सभापति लामिछानेले देशमा राजनीतिक परिवर्तन भएर, संविधान बनेर सबै किसिमका अधिकार प्राप्त भएपछि पनि आम जनताको चाहनाअनुसार काम हुन नसकेको बताए।

उनले शिर्ष नेताहरुबीच जनताको चाहनाअनुसारको काम गर्न एक ठाउँमा आउन नसकेको बताए। लामिछानेले राजनीतिक समस्या समाधान गर्न सबै दल एक ठाउँमा आएजस्तै देशको आर्थिक विकास गर्न सबै एक ठाउँमा आउनुपर्ने बताए।