संखुवासभाको सिलिचुङ गाउँपालिकामा प्रहरीले सर्च अभियान सुरु गरेको छ।
सोमबार बिहान संखुवासभाको सिलिचुङ गाउँपालिकास्थित सिसुवाखोलामा प्रहरीलाई लक्षित गर्दै बिप्लव नेतृत्वको माओवादी कार्यक्रर्ताले गोली चलाएपछि प्रहरीले जवाफी कारवाही थालेको हो ।
दोहोरो भिड्न्तमा मानवीय क्षति नभएको प्रहरीले जनाएको छ।
बिप्लव कार्यकर्ताले प्रहरी देखेपछि टाढैबाट गोली चलाएको र प्रहरीले प्रतिकार गरेको प्रहरी प्रधान कार्यालयका एसपी रमेश थापाले बताए ।
एसपी थापाका अनुसार अहिले प्रहरीले सो क्षेत्रमा घेराहाली सर्च अभियान थालेको छ।
स्थानीय प्रहरी टोलीको मद्धतका लागि प्रहरी प्रधान कार्यालयले बिहान नेपाली सेनाको एम आइ १७ हेलिकोप्टरबाट सशस्त्र प्रहरी निरीक्षक उमेश थापाको कमाण्डमा १५ जना र नेपाल प्रहरीका प्रहरी सहायक निरीक्षकको कमाण्डमा १० जनाको टोली घटनास्थल पठाएको थियो।
बिप्लव कार्यकर्ता खोजी गर्न संखुवासभाका प्रहरी प्रमुख मिन बहादुर लामाको टोली बिहानैदेखि फिल्डमा खटिएको एसपी थापाले बताए ।