विगत २४ घण्टामा देशभर कोरोनाका २ सय ४६ जना संक्रमित थपिएका छन्।
स्वास्थ्य तथा जनसंख्या मन्त्रालयका प्रवक्ता डा. जागेश्वर गौतमका अनुसार विभिन्न प्रयोगशालामा ८ हजार ६ सय ७२ जनाको पीसीआर परीक्षण गर्दा आइतबार २ सय ४६ जना संक्रमित थपिएका हुन्। याेसहित हालसम्म संक्रमितको संख्या २० हजार ३ सय ३२ पुगेको छ।
मुलुकभर ५ हजार ६ सय ७२ जना सक्रिय संक्रमित छन्। नेपालमा कुल संक्रमितमध्ये ८० प्रतिशत निको भइसकेको प्रवक्ता गौतमले बताए।
मन्त्रालयका अनुसार विगत २४ घण्टामा १ सय ११ जना कोरोनाबाट निको भइ घर फर्किएका छन्। याेसहित कुल निको हुनेको संख्या १४ हजार ६ सय ३ पुगेको छ।
हालसम्म ३ लाख ९१ हजार बढीको पीसीआर परीक्षण भएको मन्त्रालयले जनाएको छ। हालसम्म मृतक ५७ जनामा कोरोना संक्रमण पुष्टि भएको छ।
