उनी परिवर्तनमा विश्वास राख्छन् । एकै प्रकारका कुराहरु गरेर जीवनलाई मोनोटोनस (निरस) हुन दिँदैनन् । त्यसैले त २७ वर्षको सांगीतिक करियरमा रकका विभिन्न विधालाई आत्मसाथ गरेका छन् ।
‘गितार गड’ को रुपमा आफूलाई स्थापित गरिसकेका उनको आफ्नै शैली छ ।
अरुभन्दा भिन्न, सटिक र उत्कृष्ट ।
त्यसैले त उनलाई धेरैले आफ्नो ‘आइडल’ मान्छन् । र, आफ्ना प्रशंसकहरुको यस्तै मायाले उनलाई संगीतप्रति थप लगनशील हुन प्रेरित गर्छ ।
फलस्वरुपः साथीभाइ, प्रशंसकहरुकै प्रेरणामा उनले आफ्नो ब्यान्ड श्री ३ को फ्रन्टम्यान बन्ने आँट गरेका छन् । गितारमा महारथ हासिल गरिसकेका उनी हुन् आँटिला, जोसिला र हँसिला शरद श्रेष्ठ ।
शरदले १० वर्षअघि ‘द एक्स ब्यान्ड’ छोडे । आफू चर्चित हुनुमा एक्स ब्यान्डको असाध्यै ठूलो हात भएकोमा उनी सहमत छन् । तर एक्स ब्यान्ड अघि र पछिको जीवनमा कुनै परिवर्तन नभएको उनी बताउँछन् । अझ पहिलाको भन्दा उनी आफैंबाट थप प्रेरित भएको उनको बुझाई छ ।
उनी भन्छन्, ‘अहिले झन् आफैदेखि इन्स्पायर्ड छु किनभने अहिले मैले आफ्नै हिसाबको संगीत गर्न पाइरहेको छु । यो एउटा सकारात्मक पक्ष हो ।’
एक्स ब्यान्ड मूलधारको ब्यान्ड भएकोले केही निश्चित सीमा हुने गरेको तर अहिले स्थिति फेरिएको उनी बताउँछन् । अहिले आफूलाई थप प्रभावकारी ढङ्गले प्रस्तुत गर्न सकेको उनको ठम्याइँ छ ।
उनको यो दाबीप्रति पुराना दर्शक र श्रोता विमति पनि राख्छन् । उनले सन् २००९ मा टम्बलविड इंक ब्यान्ड स्थापना गर्दा धेरैले उनलाई पहिलेकै ब्यान्ड (एक्स ब्यान्ड) ठीक थियो भनेर मेसेज गर्थे । कतिले उनलाई पुरानै ब्यान्डलाई निरन्तरता दिएको भए राम्रो हुन्थ्यो भनेर सुझाए पनि । एकाधले उनलाई अहिले पनि त्यस्तै भन्छन् । तर, यसलाई उनले सकारात्मक तरिकाले हेर्ने गरेका छन् ।
‘उहाँहरुले म भएको एक्स ब्यान्डबाट अझ पनि धेरै गीतहरु सुन्न चाहनुभएको रहेछ,’ उनले भने । ‘तर अहिले टम्बलविडलाई पनि उहाँहरुले स्वीकार्नुभएको छ । समय बित्दै गयो, टम्बलविडको स्टेटस बढ्दै गयो । र, श्री ३ आएपछि झन् ‘आइ एम गेटिङ गुड ओभरह्वेल्मिङ रेस्पोन्सेस’ ।’
श्री ३ को उदयः
श्री ३ को उदयपछि पनि शरदको पुरानो ब्यान्ड टम्बलविड अस्ताएको भने छैन । उनकै भनाइमा थोरै सुस्ताएको मात्रै हो ।
केही महिनाको विश्रामपछि टम्बलविड यो जाडो महिनामा टुरको लागि जानेछ । हुन त टम्बलविडका विभिन्न शो पनि भइरहेका छन् । श्री ३ को सेप्टेम्बरको टुर सिद्धिने बित्तिकै पुनः टम्बलविडसँगको टुरको तयारीमा उनीहरु जुट्नेछन्।
