स्नातकोत्तर पढ्न भनेर चीन आएको पनि ठ्याक्कै १७ महिना पूरा भएछ । चीन आउने भनेर तयारी गर्दैगर्दा बुढी हजुरआमाले मेरी आमासँग सोध्दै हुनुहुन्थ्यो, ‘बाबु उतै त बस्दैन होला ?’ हजुरआमाको प्रश्न मेरो कानमा ठ्याक्कै ठोकियो, जवाफमा मैले हाँस्दै भनेँ, ‘दुई वर्षपछि बस्छु भने पनि त्यता बस्न पाउदिनँ आमा, जसरी नि फर्किनैपर्छ ।’

प्रश्न स्वाभाविक थियो किनकि छिमेकका अधिकांश बिदेसिएर फर्किएका छैनन् । हजुरआमाले टीका लगाइदिँदै भन्नुभयो, ‘ल राम्रोसँग पढ्नू, स्वास्थ्यको ख्याल गर्नू, फोन गर्दै गर्नू, म बूढी भइसकेँ, फर्केर आउँदा देख्न पाउँछु कि पाउँदिनँ !’