पत्रकार शालिकराम पुडासैनीको आत्महत्याको विषयमा सांसदहरूले आइतबारको प्रतिनिधिसभा बैठकमा प्रश्न उठाएका छन्।
संसदको शून्य समयमा बोल्दै सांसदहरूले अनुसन्धान प्रक्रिया प्रभावित हुनेगरी भइरहेका गतिविधि रोक्नसमेत सरकारसँग माग गरेका छन् ।
रवि लामिछानेका समर्थकहरुले अनुसन्धान प्रक्रियाप्रति अवरोध सिर्जना गरेको विषय सांसद महेश्वराज गहतराजले उठाए । ‘के निहुँ पाउँ र कनिका बुकाउँ’ भन्ने उखानलाई चरितार्थ गर्नेगरी गैरकानूनी रुपमा हुलहुज्जत गर्ने काम भइरहेको छ। म त्यसको निन्दा र भर्त्सना गर्दछु,’ उनले भने।
यसैबीच सांसद गहतराजले अनुसन्धान निष्पक्ष हुनुपर्ने समेत माग गरे।
प्रहरीले अनुसन्धान गर्ने र अदालतले दोषि ठहर गर्ने कानूनी प्रक्रिया रहेको भन्दै यसलाई उल्लङ्घन गर्दै भइरहेका क्रियाकलाप शान्ति सुरक्षा र सुशासनविरुद्ध भएको सांसद गहतराजले बताए।
‘मेरो मान्छे राम्रो हुन्छ, अपराधी हुँदैन भन्ने मनोविज्ञानले समाजलाई कतातिर लैजान्छ? आज गम्भीर चिन्ता र चासोको विषय हो’, उनले प्रश्न गरे ।
अर्का सांसद यज्ञराज सुनुवारले पनि रवि लामिछानेको गिरफ्तारीपछि भइरहेको गतिविधि अति भएकाले यसलाई तत्काल रोक्न आग्रह गरे ।
दोषीले कानूनी सजाय पाउनुपर्ने र अनुसन्धान प्रक्रियालाई खलल पुर्याउने गतिविधि रोक्न सांसद सुनुवारले सरकारको ध्यानाकर्षणसमेत गराएका थिए।
.jpg)
