Media for all across the globe

विद्युत प्राधिकरणका कार्यकारी निर्देशक शाक्यलाई इप्पानको बधाई

स्वतन्त्र ऊर्जा उत्पादकहरूको संस्था, नेपाल (इप्पान)ले कुनैपनि सरकारी तथा बाह्य निकायले दिने अनुमतिमा ढिलाई हुँदा जलविद्युत आयोजनाको निर्माण समयमै सम्पन्न हुन नसके विद्युत प्राधिकरणले सहज रुपमा आरसीओडी थप गर्नुपर्ने माग गरेको छ। सोमबार विद्युत प्राधिकरणका नवनियुक्त कार्यकारी निर्देशक हितेन्द्रदेव शाक्यलाई बधाई तथा शुभकामना व्यक्त गर्दै इप्पान अध्यक्ष गणेश कार्कीले जलविद्युत आयोजनाहरूले वन मन्त्रालयबाट रुख कटानको अनुमति नपाउँदा तथा भारतबाट बिस्फोटक पदार्थ आयातको अनुमति नपाउँदा तोकिएको समयमा विद्युत उत्पादन गर्न असमर्थ भए सहज रुपमा व्यवसायिक विद्युत उत्पादन गर्नुपर्ने मिति (आरसीओडी) थप गर्नुपर्ने बताए।

बिएल संवाददाता - काठमाडौं

राजतन्त्रविरुद्ध उर्लियो हेटौंडा एमाले

नेकपा एमाले मकवानपुरले हेटौंडामा जागरणसभा गरेको छ। हेटौंडाको मुख्यबजार लोकतान्त्रिक चोकमा एमालेले जागरण सभाको आयोजना गरेको हो। सभा सुरु हुनु अगाडि हेटौंडा बजारको चारैतिरबाट र्‍याली निकालिएको थियो। सोमबार हेटौंडाको पूर्वमा सानोपोखरा, पश्चिममा हेटौंडा हस्पिटल, उत्तरमा चौकीटोल ओरालो र दक्षिणमा फरेष्ट्री गरी चार स्थानबाट र्‍याली निस्किएर मेनरोडको लोकतान्त्रिक चोकमा कोणसभा गरिएको थियो। सभालाई संबोधन गर्दै नेकपा एमालेका केन्द्रीय सदस्य तथा मकवानपुर इन्चार्ज रामेश्वर रानाले राजावादीको आन्दोलनमा देखिएको अराजकतामा संलग्नहरूलाई कानून बमोजिम कारवाही गर्नुपर्ने बताए।

बिएल संवाददाता - हेटौंडा

घण्टीघरबाट गर्जिए रवि- दुई तिहाईको सरकारले जिउँदै छोड्यो, यही हो मेरो जित

राष्ट्रिय स्वतन्त्र पार्टीका सभापति रवि लामिछानेले वर्तमान दुई तिहाईको सरकारले आफूलाई जिउँदै छोड्नु नै आफ्नो जित भएको बताएका छन्। सोमबार रास्वपाको केन्द्रीय समितिको विशेष बैठकमा सम्बोधन गर्दै उनले लोकतन्त्र, गणतन्त्रको आडमा लुटतन्त्र मच्चाईरहेको भन्दै त्यसको खबरदारी गर्न शरीरमा एक थोपा रगत भएसम्म पछि नहट्ने बताए। उनले भने, ‘सरकारले सक्ने जति जोड बल लगाएको छ। केही नभएको भए त्यत्रो धरौटी लिन्थ्यो अदालतले? भन्छन्। तिमीहरूको दुई तिहाईको सरकारले मलाई जिउँदै छोडेको छ यही नै मेरो जित हो। शरीरमा एक थोपा रगत हुनजेलसम्म यो लुटतन्त्रको विरोधमा उभिने छु। चाहे जतिसुकै मुद्दा लगाउनु छ लगाऊ, ज्यान मार्नु छ मार, मैले व्यक्तिगत जीवनको लागि कहिल्यै केही मागेको छैन। म राजनीतिमा हुन्नथें भने यो दुःख खेप्नुपर्ने पनि थिए। लोकतन्त्र, गाणतन्त्रको आडमा लुटतन्त्र मच्चाई रहेकाहरूलाई खबरदारी गर्न रवि लामिछाने कहिल्यै पनि पछि हट्दैन।’

बिएल संवाददाता - काठमाडौं

तीनकुने घटनामा एक पक्षलाई ‘दोषी’ देखाएर सरकार उम्कन पाउँदैन: रास्वपा

राष्ट्रिय स्वतन्त्र पार्टी (रास्वपा)का सांसद मनिष झाले तीनकुने घट्नामा सरकारले एक पक्षलाई दोषी देखाएर उम्कन नपाउने टिप्पणी गरेका छन्। प्रतिनिधिसभाको आजको बैठकमा बोल्दै उनले तीनकुने प्रदर्शनमा गृह प्रशासनले चार हजार मान्छे आएको उल्लेख गरेको बताउँदै त्यति संख्या पनि किन सम्हाल्न नसकेको भन्दै प्रश्न गरे। उनले भने, ‘चैत्र १५ गतेको घटनामा कुनै एउटा पक्षलाई दोष दिएर सरकार उम्किन पाउँदैन। प्रधानमन्त्रीज्यूले अघिल्लो दिन १०-१५ हजार मान्छे ओहोरदोहोर गरिरहन्छन् भन्नुभएको थियो। तर गृह प्रशासनले चार हजार मान्छे किन सम्हाल्न सकेन? सविन महर्जनमाथि गोली लागेको थियो, उ ढुंगा हानिरहेको थिएन, उ हिँडेर फर्किरहेको बेलामा पछाडिबाट गोली हानिएको छ। भिडियो अहिले छ्याप्छ्याप्ती छ। यसमा प्रश्न उठ्दैन।’

बिएल संवाददाता - काठमाडौं

नेता-कार्यकर्ताको रिहाइको माग गर्दै माइतीघरमा राप्रपाको प्रदर्शन

राष्ट्रिय प्रजातन्त्र पार्टीले १५ गतेको आन्दोलन हिंसात्मक बनेपछि पक्राउ परेका सम्पूर्ण नेता/कार्यकर्ताहरूको रिहाइको माग राख्दै विरोध प्रदर्शन गरेको छ। सोमबार राप्रपा र निकटका संगठनले माइतीघर मण्डलामा प्रदर्शन गरेका हुन्। नेताहरूलाई झूटो मुद्दा लगाएर पक्राउ गरी कारवाही थालिएको भन्दै रिहाइको मागसहित उनीहरूले प्रदर्शन गरेका छन्। झुठा मुद्दामा पक्राउ परेका राप्रपा नेता लगायत सम्पूर्ण राष्ट्रवादी नेताहरूलाई तत्काल रिहाइ गर्नुपर्ने, शुक्रबारको घटनाका मृतकहरूलाई शहीद घोषणा गर्नुपर्ने, घटनाको न्यायोचित छानबिन गर्ने मुख्य माग राखेर उनीहरूले प्रदर्शन गरेका हुन्।

बिएल संवाददाता - काठमाडौं

लिङ्देनको चेतावनीः जनताले चाहे गणतन्त्र क्षणभरमै ढल्छ, युवाको शक्तिलाई होच्याउने काम नगर्नुस्

राष्ट्रिय प्रजातन्त्र पार्टी (राप्रपा)का अध्यक्ष राजेन्द्र लिङ्देनले जनताले चाहेको खण्डमा गणतन्त्र एकछिन पनि नटिक्ने दाबी गरेका छन्। सोमबार प्रतिनिधिसभाको बैठकमा बोल्दै उनले कांग्रेस, एमाले माओवादीलगायतका दललाई ‘तपाईँहरू मान्छे नमारी, तोडफोड नगरी आएको हो?’ भन्दै प्रश्न गरे। उनले भने, ‘जनताले चाहेको खण्डमा गणतन्त्र एकछिन पनि टिक्न सक्दैन। गणतन्त्र जान्छ। त्यसकारण जनताको, युवाको शक्तिलाई होच्याउने काम नगर्नुस्। चैत १५ गते आन्दोलनकारीले मात्रै ज्यादती गरेको हो? नियन्त्रण गर्ने जिम्मा सरकारको होइन? तपाईं कांग्रेस, एमाले भन्नेहरू आज यो सत्तामा भजन-किर्तन, मादल बजाउँदै आइपुगेको हो? तपाईंहरू तोडफोड नगरी आएको हो? मान्छे नमारी आएको हो? त्यसकारणले सविन महर्जन हिँडिरहेको बेला गोली किन हानियो? छतमाथि बसेर अश्रुग्यास किन प्रयोग गरियो? त्यसको जवाफ चाहिन्छ।’

बिएल संवाददाता - काठमाडौं

पूर्वराजालाई तत्काल कारबाही गर्न माओवादीको माग

नेकपा माओवादी केन्द्रकी सांसद रेखा शर्माले वर्तमान संघीय लोकतान्त्रिक गणतन्त्रात्मक व्यवस्थाको विकल्प राजतन्त्र हुनै नसक्ने दाबी गरेकी छन्। सोमबार प्रतिनिधिसभाको बैठकलाई सम्बोधन गर्दै उनले राजतन्त्रतिर जाने कुरा विकल्प नभएर पश्चगमनमात्रै रहेको बताएकी हुन्। पश्चगमनको पक्षमा आफूहरू यसअघि कोहीपनि नरहेको र नहुने पनि बताइन्। उनले भनिन्, ‘तीनकुनेको प्रदर्शनको प्रत्यक्ष कमाण्ड कथित कमाण्डर दुर्गा प्रसाईँले गरेका छन्। तर, हामी सबैले के बुझेका छौं भने यसको पर्दा पछाडि पूर्वराजा ज्ञानेन्द्र शाह छन्। उनको उक्साहटमा, उनले पटक-पटक गरेका आह्वानमा, अपिलमा युवाहरू समाहित भएका छन्। म सरकारसँग सभामुखमार्फत के माग गर्न चाहन्छु भने- राजतन्त्र अहिलेको व्यवस्था होइन, संविधान भन्दामाथि कोही छैन। कानुनभन्दा माथि कोही छैन। त्यसकारण चाहे पूर्वराजा ज्ञानेन्द्र शाह हुन्, चाहे सामाजिक सञ्जालमा सक्रिय अहिले लुकेर बसेका दुर्गा प्रसाईँ हुन्। सबैलाई कारबाही गरोस।’

बिएल संवाददाता - काठमाडौं

पार्टी फुटेपछि पहिलोपटक नेकपा एसको कार्यालयमा ओली, सध्रिएला सम्वन्ध?

प्रधानमन्त्री केपी शर्मा ओली पहिलोपटक पूर्वसहकर्मी माधवकुमार नेपालको पार्टी कार्यालय आलोकनगर पुगेका छन्। २०७८ भदौ २ गते नेपालले एमाले फुटाएर नेकपा एकीकृत समाजवादी पार्टी दर्ता गराएपछि पहिलोपटक ओलीले उनको पार्टी कार्यालयमा पाइला टेकेका हुन्। आइतबार निधन भएका नेकपा एकीकृत समाजवादी निकट वरिष्ठ पत्रकार तथा लेखक कमल कोइरालालाई अन्तिम श्रद्धाञ्जली दिन प्रधानमन्त्री ओली एसको पार्टी कार्यालय पुगेका हुन्। श्रद्धाञ्जली दिन पुगेका ओलीले एसका अध्यक्ष नेपाल, महासचिव घनश्याम भुसाल लगायतका नेताहरूसँग कुराकानीसमेत गरेका नेकपा एसले जनाएको छ।

बिएल संवाददाता - काठमाडौं

राजावादीलाई विश्वप्रकाशको प्रश्न- तीनकुने घटनामा सबैको हृदय दुख्दा ज्ञानेन्द्रको दुखेन, यस्तै राजा खोजेको?

नेपाली कांग्रेसका सांसद विश्वप्रकाश शर्माले तीनकुनेको घट्नामा सारा जनताको हृदय दुख्दा पूर्वराजा ज्ञानेन्द्र शाहको हृदय किन नदुखेको भन्दै प्रश्न गरेका छन् सोमबार प्रतिनिधिसभाको बैठकमा बोल्दै उनले राजा चाहियो भन्दै आन्दोलनमा उत्रिएका युवाहरूलाई समेत प्रश्न गरे। उनले भने, ‘शुक्रबारको घटनामा सबै राजनीतिक दलको वक्तव्य आएको छ। तोडफोड हुँदा सबैलाई दुख्यो तर निर्मल निवासलाई दुखेन। नागरिक मर्दैगर्दा धेरैलाई दुख्यो तर निर्मल निवासलाई दुखेन। राजा चाहियो भन्ने युवाहरूलाई म भन्न चाहन्छु- तीनकुने घट्नाले तपाईको हृदयलाई दुख्दै गर्दा हृदय नदुख्ने कस्तो राजा तपाईहरूले परिकल्पना गर्दै हुनुहुन्छ?’ त्यस्तै उनले गणतन्त्रको विकल्प खोज्ने भन्दापनि यसको प्रक्रियामा सुधार गर्नुपर्ने बताएका छन् ।

बिएल संवाददाता - काठमाडौं

कुलमानलाई हटाएकोमा ओलीको जवाफ- ‘मन्त्रीलाई नटेर्ने कर्मचारी हट्छन्’

प्रधानमन्त्री केपी शर्मा ओलीले सरकारले कर्मचारी हटाउने र नयाँ जिम्मेवारी दिने प्रक्रिया सामान्य भएको दाबी गरेका छन्। सोमबार प्रतिनिधिसभाको बैठकमा बोल्दै ओलीले एकजना कर्मचारीको विषयमा प्रश्न उठाएर सदन अबरुद्ध गरी महत्वपूर्ण संसदीय कार्यमा बाधा पुग्न नहुने बताए। उनले भने, ‘केही दिनयता संसद अबरुद्ध छ। सुशासन र त्यसमा कम्प्रमाइज भएका विषयमा प्रश्न उठ्नु स्वभाविक छ। सरकारका कामकारबाहीप्रति प्रश्न उठाउने वा समर्थन गर्ने स्थल नै यस सम्मानित सदन हो। तर अहिले विषय सामान्य छ, एकजना कर्मचारीको विषयमा प्रश्न उठेको छ। सदन अबरुद्ध छ, महत्वपूर्ण संसदीय कार्यमा बाधा पुगेको छ। मन्त्रीप्रति लोयल्टी नभएको कर्मचारीसँग मन्त्रीले सहकार्य गर्न सहज मानेन भने हट्छ, यो स्वाभाविक प्रक्रिया हो, देशका महत्त्वपूर्ण विषयमा छलफल गरेर निर्णय गरेर अघि बढ्नुपर्ने समयमा एउटा सामान्य कर्मचारीको विषयमा संसद् अल्झनु हुन्न।’

बिएल संवाददाता - काठमाडौं

गणतन्त्रवादीहरूलाई चेतावनी दिने छुट राजावादीलाई छैनः महेश बर्तौला

नेकपा एमालेका सांसद महेश बर्तौलाले ‘राजावादी हुँ’ भन्दैमा गणतन्त्रवादीहरूलाई वा संसदलाई चेतावनी दिने छुट कसैलाई नभएको चेतावनी दिएका छन्। सोमबार प्रतिनिधि सभाको बैठकमा नियमापत्ति गर्दै उनले समाजमा अराजकता मचाउने, जिउँदै मान्छे जलाउने, लुटपाट मच्चाउने, आगजनी गर्नेहरूलाई बल पुग्नेगरी गणतन्त्रको संसदले कोही कसैलाई पनि अनुमती नदिएको भन्दै यस्तो विरुद्धमा उभिने बताए। उनले भने, ‘समाजमा अराजकता मचाउने, जिउँदै मान्छे जलाउने, लुटपाट मचाउने, आगजनी गर्नेहरूलाई बल पुग्नेगरी संसदले कोही कसैलाई पनि अनुमती दिदैन। त्यसप्रकारका क्रियाकलापहरू राजावादी हुँ भनेकै आधारमा गणतन्त्रवादीहरूलाई वा संसदलाई चेतावनी दिने छुट कसैलाई छैन। यस्तो कतैबाट हुन्छ भने त्यस विरुद्धमा हामी उभिन्छौं।’

बिएल संवाददाता - काठमाडौं

प्रधानमन्त्रीको प्रस्ताव : सरकार फेरिएसँगै नियुक्ति पाएकाहरू स्वत: पदमुक्त हुने व्यवस्था गरौँ

‘बरु यस्तो गरौं लोकसेवाबाट आएकाहरू बाहेक सरकारले नियुक्त गरेका व्यक्तिका पदहरू सरकार फेरिएसँगै स्वत: पदमुक्त हुने व्यवस्था गरौं। यसका बारेमा छलफल गरौं’ उनले भने ‘ब्यक्ति ब्यक्तिको नियुक्ती वा बर्खास्तका विषयमा संसदले हात हाल्ने होइन। त्यो सरकारको कुरा हो। व्यक्ति व्यक्तिको नियक्ति, बर्खास्तमा संसद लाग्यो भने उसका कामहरू छुट्छन्।’

बिएल संवाददाता - काठमाडाैं

राजावादीलक्षित ओलीको कटाक्ष- तीनकुने घटना आपराधिक थियो, ज्ञानेन्द्रले ऐतिहासिक सम्झौता उल्लघंन गरे

प्रधानमन्त्री केपी शर्मा ओलीले शुक्रबार तीनकुने आन्दोलनमा भएको हिंसात्मक घट्नामा संलग्न जोकोहीलाई कडा कारबाही गरिने चेतावनी दिएका छन्। सोमबार बसेको प्रतिनिधिसभाको बैठकलाई सम्बोधन गर्दै उनले घटनामा संलग्न जुनसुकै कभरमा बसेपनि कडा कारबाही गर्ने चेतावनी दिए। उनले भने, ‘शुक्रबार तीनकुनेमा भएको शान्तिपूर्ण आन्दोलन भनिएकोमा आपराधिक घटना सुरु गरियो। आगजनी गरियो। मानिसलाई घरभित्रै थुनेर बाहिरबाट ताल्चा लगाएर जिउँदै जलाएर हत्या गरियो। प्रहरीको बन्दुक खोस्ने, कुटपिट गर्ने ढुंगामुढा, तोडफोट, लुटपात जस्ता अपराधिक घट्ना गरियो। अन्य आतंककारी काम समेत भयो। यी सबै निन्दनीय र खेलजनक क्रियाकलाप हुन्। यस्ता घटनामा संलग्नहरूमाथि जोसुकै जोस्, जुनसुकै कभरमा किन नहुन कडा प्रशासनिक कारबाही हुन्छ।’

बिएल संवाददाता - काठमाडौं

संसदमा प्रधानमन्त्री र राप्रपा सांसदबीच चर्काचर्की

प्रधानमन्त्री केपी शर्मा ओली र राप्रपा सांसदहरूबीच संसदमै चर्काचर्की परेको छ। ओलीले बोल्न समय पाएको बेलामा पूर्वराजाको बारेमा प्रसंग निकालेपछि राप्रपा सांसदहरूले उठेर विरोध गरेका थिए। त्यसपछि प्रधानमन्त्री केपी ओलीले झर्किँदै जवाफ दिएका छन्। उनले नागरिकको हैसियतमा रहेका पूर्वराजालाई दोषका आधारमा कारबाही गरिने चेतावनी दिए। उनले गलत काममा संलग्न भएमा पूर्वराजालाई पनि नछोड्ने चेतावनी दिए।

बिएल संवाददाता - काठमाडौं

संसदमा झाेक्किदैं प्रधानमन्त्रीले भने ‘ज्ञानेन्द्र शाहले पनि उन्मुक्ति पाउने छैनन्’

‘त्यहाँ व्यक्तिको घरमात्रै तोडफोड गरिएन। घरमा आगो लगाइदिएर पत्रकार थुनेर मारियो’ उनले भने ‘जो सुकै भए पनि घटनामा संलग्नहरूलाई कारबाही हुन्छ। त्यो कार्यक्रमको योजनाकारहरूको पहिचान गरेर कारबाही हुन्छ।’

बिएल संवाददाता - काठमाडाैं

मन्त्रिपरिषद बैठक बस्दै

आजै प्रधानमन्त्री केपी शर्मा ओलीले संसदमा सम्बोधन गर्दैछन्। नेपाल विद्यु प्राधिकरणका कार्यकारी निर्देशक कुलमान घिसिङलाई हटाएपछि प्रतिपक्ष सांसदहरूले प्रधानमन्त्रीको जवाफ माग्दै संसद अवरुद्ध गरिरहेका थिए।

बिएल संवाददाता - काठमाडाैं

तीनकुनेका मुख्य अभियुक्त ज्ञानेन्द्र शाह नै हुन्, मुद्दा चलाउनुपर्छ

मूल योजनाकार नै ज्ञानेन्द्र शाह देखिन्छन्, निर्मल निवास देखिन्छ। निर्मल निवासको प्रत्यक्ष योजनामा, निर्देशन र उक्साहटमा क्रियाकलाप भएको देखिएको छ। किनकी फागुन ६ गते पूर्वराजाको वक्तव्यबाट सबै कुरा स्पष्ट हुन्छ। ‘कदम चाल्ने बेला आयो, तपाईहरूको साथ चाहियो’ भनेर उहाँले के भन्न खोज्नु भएको हो ?

बिएल संवाददाता - काठमाडाैं

केन्द्रीय क्याम्पसमा आज स्ववियु चुनाव हुँदै

विद्यार्थी संगठनहरूको विवादका बीच ५ गते हुन नसकेको चुनाव चैत ८ गते तोकिएको थियो। तर उच्च अदालतले अल्पकालीन आदेश दिएका कारण त्यो चुनाव पनि रोकिएको थियो। शुक्रबार फेरि अदालतले अन्तरिम आदेशलाई निरन्तरता दिन नपर्नेगरी अर्को आदेश जारी गरेपछि आज चुनाव हुन थालेको हो।

बिएल संवाददाता - काठमाडाैं

आज इदको उल्लास, सार्वजनिक विदा

इस्लाम धर्मावलम्बीहरुले सोमबार इद मनाउँदै छन्। एक महिना लामो रमादान पर्व (रोजा) पूरा भएको खुशीयालीमा आज इद उल फित्र मनाउन लागिएको हो।

बिएल संवाददाता - काठमाडाैं

प्रधानमन्त्रीले सम्बाेधन गर्ने, संसदका अरु कार्यसूची के छन्?

बैठकमा प्रधानमन्त्री केपी शर्मा ओलीले सम्बोधन गर्ने कार्यसूची रहेको छ। ओलीले गत शुक्रबार भएको राजावादीहरूको हिंसात्मक आन्दोलन, विपक्षी दलहरूले उठाउँदै आएको नेपाल विद्युत प्राधिकरणका कार्यकारी निर्देशक कुलमान घिसिङको बर्खास्ती प्रकरणलगायत विषयमा सम्बोधन गर्ने कार्यसूची छ।

बिएल संवाददाता - काठमाडाैं