त्रिभुवन अन्तर्राष्ट्रिय विमानस्थलबाट टर्कीको इस्तानबुलका लागि उडेको टर्किस एयरलाइन्सको जहाजको दायाँ इन्जिनमा आगलागी भएपछि कोलकाता डाइभर्ट भएको छ।

टर्किसको उडान नम्बर ‘टीएचवाई ७२७’ को जहाज त्रिभुवन विमानस्थलबाट बुधबार दिउँसो १:२८ बजे उडेको ४ मिनेटमै दायाँ इन्जिनमा आगलागी भएको जहाजका क्याप्टेनले जानकारी गराएका थिए।

लगत्तै टर्किस चालकदलले जहाजलाई पश्चिम दिशामा लगेर दायाँ इन्जिन बन्द गरेर १० देखि १२ मिनेट होल्ड गरेका विमानस्थलका महाप्रबन्धक टेकनाथ सिटौलाले जानकारी दिए।

जहाजको इन्जिनमा आगलागी भएको खबर आउनासाथ त्रिभुवन विमानस्थल १५ मिनेटका लागि पूर्णरूपमा बन्द गरिएको थियो। र आपतकालीन उद्धारको सम्पूर्ण तयारी गरिएको थियो।

केहीबेर होल्ड गरेपछि चालकदलले भारतको कोलकाता डाइभर्ट गर्ने अनुमति मागेपछि अनुमति दिइएको महाप्रबन्धक सिटौलाले बताए। सो जहान अहिले कोलकतामा सुरक्षित अवतरण गरिसकेको छ।

टर्किस एयरको ‘ए३३०-३०३’ सिरिजको उक्त वाइड बडी जहाज २ सय २५ यात्रु बोकेर इस्तानबुल जाँदै थियो।