नेपाल पत्रकार महासंघका अध्यक्ष विपुल पोखरेलले सञ्चार माध्यमहरुले सामाजिक मुद्दा उठाउनुपर्ने जरुरी रहेको बताएका छन्।

राष्ट्रिय समाचार समिति (रासस) नेपाली भाषामा २४ घण्टा समाचार सेवा शुभारम्भ समारोहलाई सम्बोधन गर्दै अध्यक्ष पोखरेलले अहिलेका सञ्चार माध्यमहरुले सोसल मिडियाको भ्यूजको लोभमा परेर सनसनीपूर्ण समाचारहरु प्रसारण गरेर स्वच्छ पत्रकारिता ओझेलमा पर्दै गएको बताएका हुन्।

उनले भने, ‘सञ्चार माध्यमहरुले सामाजिक विषयहरुलाई प्राथमिकतामा राख्नुपर्छ। हिजोआज सोसल मिडिया हेर्दा भ्यूजको लोभमा परेर केही सञ्चार माध्यमहरुले सनसनीपूर्ण समाचार र शीर्षक हालेर बिक्छ भनेर मनोविज्ञानका साथ काम गरिरहेको अवस्था छ।’

साथै उनले मनोविज्ञानले काम गर्दै जाँदा खोजी समाचारहरु, सामाजिक मुद्दाहरु ओझेलमा पर्ने बताए। उनले सामाजिक मुद्दाहरुलाई कडा मेहनतका साथ समाचारका रुपमा अगाडि सार्नुपर्ने उल्लेख गरे।