राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङ्देनले सौर्य एयरलाइन्सकाे जहाज दुर्घटनामा कुन प्रकारको छानबिन समिति बनाइएको हो भनेर प्रश्न गरेका छन्।

आइतबार प्रतिनिधिसभाको बैठकमा बोल्दै उनले यो घटनाको प्रमुख दायरामा अउने व्यक्ति नै सरकारको छानबिन समितिमा रहेको बताएका हुन्।

‘सौर्य एयरलाइन्सकाे जहाज दुर्घटना जुन छानबिन आयोग गठन भएको छ, त्यसमा गम्भीर त्रुटि भएको भन्ने कुराहरु बाहिर आएका छन् , यसलाई सरकारले सुनेर छाड्ने विषय होइन, त्यो सौर्य विमान पोखरा उड्नको लागि उपयुक्त थियो कि थिएन भन्ने कुरा जाँच गर्ने र अनुमति दिने सुरक्षा प्रमुख जो चाहिँ अनुसन्धानको पहिलो दायरामा आउँछन्, उनका भिनाजुलाई चाहिँ अहिले छानबिन आयोगको प्रमुख बनाइएको छ भन्ने कुरा बाहिर आएको छ यो कुन प्रकारको छानबिन आयोग होला’, अध्यक्ष लिङ्देनले भने।

उनले पटक पटक एउटै मान्छेलाई छानबिनकाे जिम्मा दिएर सरकार मौन किन रहेको भन्दै ध्यानाकर्षण गराए।