‘पाम नट’ उल्लेख गरेर ल्याइएको एउटा कन्टेनर गत महिना नेपालगन्ज भन्सार कार्यालयले शंका लागेपछि नियन्त्रणमा लियो । पामको दानाबाट तेल निकाल्ने उद्योग नेपालमा नभएकाले कार्यालयले नमुना भन्सार विभागमा पठायो । प्रयोगशाला परीक्षणबाट पाम नट भनिएको वस्तु सुपारी देखियो । पाम नट नाम दिएर सुपारी आयात गरेको खुल्यो ।
सरकारले जथाभावी सुपारी आयातलाई प्रतिबन्ध नै लगाएको छ । उद्योगहरूले कच्चा पदार्थका रूपमा मात्र प्रयोग गर्ने गरी वाणिज्य विभागबाट अनुमति लिएर सुपारी आयात गर्न पाउँछन् । तर, पामको तेल निकाल्ने दाना ‘पाम नट’को नाम दिएर प्रतिबन्धित सुपारीको व्यापक तस्करी हुँदै आएको तथ्य खुलेको छ ।
