दाङमा एक युवकमाथि निर्घात कुटपिट भएको छ। राजपुर गाउँपालिका–३ खरदरियाका १९ वर्षीय मन्साराम यादवमाथि प्रेमिकाका बुवाले निर्घात कुटपिट गरेका हुन्।
मन्सारामलाई साउन २१ गते उनकी प्रेमिका सीता (परिर्वतीत नाम) को फोन आयो। प्रेमिकाले बोलाएपछि उनी साइकल चढेर राति नै ९ बजे भेट्न तीन किलोमिटर टाढा केटीको घर राजपुर–३ स्थित बेला पुगे।
जब उनी प्रेमिकाको घर नजिक पुगे, तब केही व्यक्तिहरु आएर उनीमाथि कुटपिट गर्न थाले। इलाका प्रहरी कार्यालय गढवाका अनुसार मन्सारालाई निर्घात रुपमा कुटपिट गर्दै स्थानीय धीरबहादुर यादवको घरमा लगेर टाउको, मुख, खुट्टामा गहिरो चोट पुग्ने गरी आक्रमण गरे।
उनीमाथि कुट्ने अरु कोही नभएर किशोरीका बुबा अर्थात आफ्नै शिक्षक पाटेश्वर यादव थिए। प्रहरीका अनुसार मन्साराम र किशोरी एउटै विद्यालयमा अध्ययनरत विद्यार्थी हुन्।
शिक्षक यादवले आफ्नी छोरी र किशोरबीच प्रेम भएको थाहा पाएपछि छोरीलाई नै फोन गर्न लगाएर भेट्न बोलाइ किशोरलाई निर्घात कुटपिट गरेको इलाका प्रहरी कार्यालय गढवाकी प्रहरी निरीक्षक रञ्जु केसीले बताइन्।
किशोर यादवमाथि चिर्पट, लात्ती र मुक्काले निर्घात कुटपिट गरी गम्भीर घाइते भएका छन्। उनको अहिले नेपालगञ्जमा उपचार भइरहेको छ।
योजनाबद्ध घटना
मन्सारामलाई कुटपिटको घटना योजनाबद्ध भएको प्रहरी बताएको छ। ‘यादवलाई कुटपिट गरेपछि शिक्षक पाटेश्वर यावदले रातिको समयमा चोरी गर्न आएको हुँ भन्ने स्विकार्न बाध्य बनाइ नक्कली कागज बनाएको पाइयो’, प्रहरी निरिक्षक केसीले भनिन्, ‘घटनाको प्रकृति हेर्दा योजनाबद्ध ढंगबाट कुटपिट गरेको र चोरी स्विकार्न लगाएको कागज घटनास्थलबाट पाइएको छ।’
उक्त कागजमा आफू चोरी गर्न आएको र सो क्रममा घरधनीले फेला पारी सामान्य कुटपिट गरेको र प्रहरीमा उजुर गर्ने छैन भनी स्वीकार गर्न बाध्य गराइएको छ।
पीडित मन्सारमले आफूमाथि कुटपिट भएको भन्दै साउन २३ गते इप्रका गढवामा जाहेरी दिएका थिए। प्रहरी निरीक्षक केसीका अनुसार मन्सारामलाई कुटपिट गरेको आरोपमा शिक्षक पाटेश्वर यादव र यादवका दाइ धीरबहादुर यादवलाई घटनाको दुई दिनपछि प्रहरीले पक्राउ गरेको हो। कुटपिटमा संलग्न ३ जना भने अझै फरार रहेको गढवा प्रहरीले जनाइएको छ।
