घरबाटै लागूऔषध बिक्री वितरण गर्दै आएका एक व्यक्तिलाई प्रहरीले पक्राउ गरेको छ।

गोल बजार नगरपालिका ४ बस्ने ४२ बर्षीय मनोजकुमार साहलाई उनको आफ्नै घरबाट आइतबार पक्राउ गरिएको सिरहा प्रहरीले जनाएको छ।

उनकाे घरबाट प्रतिवन्धित लागूऔषध डाइलेक्स डिसी ६७ बोतल, नाइट्रोभेट ट्याब्लेट १ सय ६५ थान बरामद गरी उनलाई पक्राउ गरिएको सिरहा प्रहरीका प्रवक्ता बिनोद घिमिरेले जानकारी दिए।

उनलाई इलाका प्रहरी कार्यालय गोलबजारमा राखी आवश्यक अनुसन्धान कार्य भइरहेको प्रहरीले जनाएको छ।

यस्तै, धनुषाको नगराइन नगरपालिका २ राघवपुरबाट लागूऔषध एक्सिप्लोन सिरफ ६१ बोतल, नाइट्रोभेट ट्याब्लेट २५० थान बरामद गरिएकाे छ।

सीमा प्रहरी चौकी लग्मा जटहीबाट खटिएको प्रहरी टोलीलाई देख्नासाथ लुकीछिपी भारतबाट नेपालतर्फ पैदल ल्याउँदै गरेका व्यक्ति भने फरार भएको प्रदेश प्रहरी कार्यालय, जनकपुरधामले जनाएको छ।