भारतले मिचेको नेपाली भूमि समेटेर जारी भयो नेपालको राजनैतिक नक्सा (भिडियो)

बिएल संवाददाता

काठमाडौं

• • •

नेपालले लिम्पियाधुरा, लिपुलेक र कालापानीसहितको नयाँ नक्सा औपचारिक रुपमा बुधबार सार्वजनिक गरेको छ।

गत जेठ ५ गते बसेको मन्त्रिपरिषद्को बैठकबाट पारित लिपुलेक, लिक्पियाधुरा र कालापानी समेटिएको नक्सा आज सार्वजनिक भएको हो।

भूमि व्यवस्था, सहकारी तथा गरिबी निवारण मन्त्री पद्मा अर्यालले आफूले पेश गरेको नक्सा स्वीकृत भएपछि बुधबार सार्वजनिक गरेकी हुन्।

नेपाल, भारत र चीनको त्रिदेशीय नाका पर्ने उक्त नेपालको भूभागबाट मानसरोवर जोड्ने गरी भारतले एकलौटी रुपमा बाटो खनेर उद्घाटन गरेसँगै त्यसको विरोध भएको थियो ।

आगामी आर्थिक वर्षको लागि सरकारले ल्याएको नीति तथा कार्यक्रम प्रस्तुत गर्ने क्रममा राष्ट्रपति विद्यादेवी भण्डारीले नेपालले नक्सा सार्वजनिक गरिने उद्घोष गरेकी थिइन् ।

साथै प्रधानमन्त्री केपी शर्मा ओलीले जेठ ६ गते संसदमा सम्बोधन गर्ने क्रममा जसरी पनि आफ्नो भूभाग फिर्ता ल्याउने अडान लिएको बताएका थिए ।

भूमि व्यवस्था, सहकारी तथा गरिबी निवारण मन्त्रालयले कालापानी, लिपुलेक र लिम्पियाधुरा समेटिएको नयाँ नक्सा बुधबार दिउँसो औपचारिक रुपमा सार्वजनिक गरेको हो । जहाँ ७५३ वटै स्थानीय तह र अन्तर्राष्ट्रिय नाका समेत तोकिएको छ।

“हामीसँग प्रयाप्त प्रमाण छ तथ्यका आधारमा यो नक्सा सार्वजनिक गरेका हौँ, यसले नेपालको मनोवल उच्च बनाउनेमा विश्वस्त छौ। हाम्रो भूभाग जोगाउन दुढ संकल्प र अटल आत्मविश्वास सहित लागि रहने छौ,” नक्सा जारी गर्दै भूमी व्यवस्था मन्त्री अर्यालले भनिन्।

यसअघि मंगलबार मुख्य सचिव लोकदर्शन रेग्मीले कालापानी, लिम्पियाधुरा र लिपुलेक समेटिएको नेपालको नयाँ राजनीतिक नक्सा प्रमाणीकरण गरेका थिए।

उक्त अतिक्रमित भूमी बाहेक नेपालको कुल क्षेत्रफल १ लाख ४७ हजार १ सय ८१ वर्गकिलोमिटर थियो। नयाँ नक्साअनुसार नेपालको कुल क्षेत्रफल १ लाख ४७ हजार ५ सय १६ वर्ग किलोमिटर कायम हुनेछ । अतिक्रमित भूभागको क्षेत्रफल ३३५ वर्गकिलोमिटर छ।

यो पनि हेर्नुहोस्

नेपालको नयाँ नक्सा जारी, ‘प्रधानमन्त्री ओलीको सिंह चढेर सवारी ?’