विश्व कपको ४४ वर्षको इतिहासमा सबैभन्दा रोमाञ्चक खेलमा बाउन्ड्रीको आधारमा क्रिकेटको जननी मानिएको इंग्ल्यान्डले २०१९ को विश्व कपको उपाधि जितेको छ।
निर्धारित ५० ओभरको खेल इंग्ल्यान्ड र न्युजिल्यान्डबीच २ सय ४१ रनको बराबरीमा टुँगिएको थियो। यसपछि भएको सुपर ओभरमा दुबै टोलीले १५–१५ रन बनाए। तर, इनिङमा न्युजिल्यान्डले १६ र इंग्ल्यान्डले २४ बाउन्ड्री लगाएपछि बाउन्ड्रीको आधारमा इंग्ल्यान्ड विजयी भयो।
इंग्ल्यान्डको जितमा अलराउन्डर बेन स्टोक्स नायक सावित भए। न्युजिल्यान्डले जितका लागि राखेको २ सय ४२ रनको लक्ष्यलाई स्टार ब्याट्सम्यान आउट भइसकेको अवस्थामा स्टोक्सले अविजित ८४ रन बनाउँदै आफ्नो टिमको जितलाई निभ्न दिएनन्। स्टोकले जस बटलरसँग मिलेर पाँचौ विकेटका लागि १ सय १० रनको सतकीय साझेदारी गरेका थिए।
बटलर ५९ रनमा आउट स्टाेक्सले सबै स्टार खेलाडी आउट भइसकेकाे अवस्थामा आफ्नो संयमता गुमाएनन्। उनकै कारण अन्तिम ओभरमा १६ रन बनाउने चुनौति पाएको इंग्ल्यान्डले २ सय ४१ रन बनाएर ५० ओभरको खेल बराबरी ग¥यो।
सुपर ओभरमा फेरि ब्याटिङ गर्न आएको इंग्ल्यान्डका लागि एक ओभरमा स्टोक्स र बटलरले १५ रन बनाएका थिए। न्युजिल्यान्डका लागि ट्रेन्ट बोल्टले बलिङ गरेका थिए।
सुपर ओभरमा १६ रनको चुनौति पाएको न्युजिल्यान्डलले पनि १५ रन नै बनायो। न्युजिल्यान्डका लागि जिमी निसाम र मार्टिन गुप्टिल ब्याटिङका लागि आएका थिए। इंग्ल्यान्डले युवा बलर जोफ्रा आर्चरलाई बलिङका लागि उतारेको थियो।
यसअघि टस जितेर पहिलो ब्याटिङ गरेको न्युजिल्यान्डले ८ विकेटको क्षतिमा २ सय ४१ रन बनाएको थियो। प्रतिउत्तरमा इंग्ल्यान्डले पनि बराबरी रन बनाएको थियो ।
