साथीलाई बोत्तल प्रहार गरी घाइते बनाएको अभियोगमा इलाका प्रहरी कार्यालय बेलचौताराले चार युवालाई सोमबार पक्राउ गरेको छ।

तनहुँको शुक्लागण्डकी नगरपालिका–३ कवासेस्थित एक होटलमा मनोज कार्कीलाई बियरको बोत्तलले हानी घाइते बनाएको अभियोगमा प्रहरीले ती युवालाई पक्राउ गरेको हो।

पक्राउ पर्नेमा सोही ठाउँका वीरबहादुर थापा, सुमन खड्का, सुमित थापा र लोकबहादुर थापा रहेको जिल्ला प्रहरी कार्यालयका प्रहरी नायब उपरिक्षक लीलाराज लामिछानेले जानकारी दिए।

आइतबार राति भएको झगडामा टाउको र दाहिने हातमा चोट लागेका कार्कीलाई पोखरामा प्राथमिक उपचारपश्चात् थप उपचारका लागि काठमाडौँस्थित शिक्षण अस्पताल पठाइएको प्रहरीले जनाएको छ।रासस