बुटबल– नेपालमा सानादेखि ठूलासम्मका आयोजना सम्झौता गरेको मितिमै सम्पन भएका उदाहरण निकै कम छन् । यस्तैमा सन् २०११÷१२ देखि चर्चा सुरु भएको भैरहवास्थित गौतमबुद्ध अन्तर्राष्ट्रिय विमानस्थलको म्याद अहिले तेस्रो पटक थप गर्ने तयारी भएको छ ।
विमानस्थलको भौतिक संरचना निर्माणको जिम्मा पाएको चिनियाँ कम्पनी नर्थवेस्ट सिभिल एभिएसन कन्स्ट्रक्सनलाई तेस्रो पटक ६ महिना म्याद थप्ने तयारी भएको हो ।
म्याद थपका लागि गौतमबुद्ध विमानस्थल निर्माण आयोजनाले प्रस्ताव पठाएको छ । आयोजना प्रमुख प्रवेश अधिकारले आफूहरुले प्राधिकरणलाई प्रस्ताव पठाइसकेको भए पनि निर्णय भने हुन बाँकी रहेको रातोपाटीलाई जानकारी दिए ।
सन् २०१३ मा टेन्डर आह्वान गरी सन् २०१४ चिनियाँ कम्पनी र नेपाल नागरिक उड्डयन प्राधिकरणबीच काम गर्ने सम्झौता भएको थियो ।
त्यसपछि सन् २०१५ अर्थात् २०७१ सालमा तत्कालीन प्रधानमन्त्री सुशील कोइरालाले विमानस्थलको शिलान्यास गरेका थिए । तीन वर्षभित्र सम्पन गर्ने गरी उक्त आयोजनाको जिम्मेवारी चिनियाँ कम्पनीले पाएको थियो ।
तर चिनियाँ कम्पनीले राखेको सर्त र स्थानीय कम्पनीबीचको तालमेल नममिल्दा निर्माणको कामले तीव्रता पाउन सकेन । जसअनुसार तीन वर्षको अवधिमा आयोजनाको काम जम्मा २७ प्रतिशत मात्र हुन नसकेको आयोजना प्रमुख अधिकारी स्मरण गर्छन् ।
