काठमाडौं: कृषि तथा वन विज्ञान विश्वविद्यालयका प्रद्यापकहरुले विश्वविद्यालयले शैक्षिक माफियाहरुको दबाबमा आएर निजी कलेजहरुलाई सम्बन्धन दिएको आरोप लगाउँदै सम्बन्धन तथा विद्यार्थी भर्ना खारेज गर्न माग गरेका छन्। पछिल्लो पटक कलेजको सम्बन्धनको विषयमा सर्वोच्चमा मुद्दा विचारधीन रहेको बेला निजी कलेजहरुले विद्यार्थी भर्ना गरी अध्ययन गराई रहेको र विश्वविद्यालयलाई विद्यार्थी रजिष्ट्रेसनका लागि दबाव दिइएको आरोपसमेत उनीहरुले लगाएका छन्।
माफियाको प्रभावमा परेर विश्वविद्यालयमा रजिष्ट्रेसन प्रक्रिया अगाडि बढेको भन्दै नेपाल प्रगतिशील प्रध्यापक संगठन र नेपाल राष्ट्रिय प्रध्यापक संगठनले विरोध गरेका छन्।
मंगलवार राजधानीमा पत्रकार सम्मेलन गरी प्रध्यापकहरुले कलेजको सम्बन्धन प्रक्रिया नटुंगिइ भर्ना लिइएको भन्दै विरोध गरेका छन्। 'प्रस्तावित कलेजहरुको सम्बन्धन प्रक्रिया टुंगिसके पश्चात पनि विश्वविद्यालयले पुन: अनुगमन गरेर त्यसपछिको स्वीकृतिको आधारमा विद्यार्थी भर्नाको लागि अगाडि बढ्ने प्रावधान छ,' दुई संगठनले जारी गरेको वक्तव्यमा भनिएको छ, 'तर, हालसम्म सर्वोच्चमा विचाराधिन मुद्दाको अन्तिम फैसला पनि अइनसकेको र विश्वविद्यालयको तर्फबाट समेत कुनै पनि प्रकारको अनुगमन र निरिक्षण पनि भएको छैन।'
