गणतन्त्र केही मुठ्ठिभरका विचौलियाका लागि मात्रै आयो: झलनाथ खनाल
नेकपा (एकीकृत समाजवादी)का सम्मानित नेता झलनाथ खनालले गणतन्त्र केही मुठ्ठीभरका बिचौलियाका निम्ति मात्रै भएको बताएका छन्। गणतन्त्र दिवसको अवसरमा नेकपा एकीकृत समाजवादीले बिहीबार काठमाडौंमा आयोजना गरेको कार्यक्रममा बोल्दै उनले अहिले देशको गणतन्त्र आम जनताको लागि नभइ शोषकहरूको गणतन्त्र बनिरहेको बताएका हुन्। उनले भने, ‘यो गणतन्त्र केही मुठ्ठीभरका विचौलियाको निम्ति थिएन। यो गणतन्त्र मुठ्ठिभरका दलाल पूँजीपति वर्गको निम्ति मात्रै स्थापना गरिएको होइन। यो गणतन्त्र विभिन्न किसिमका भ्रष्ट तत्वहरूको हितका निम्ति स्थापित गरिएको थिएन। अहिले देशको गणतन्त्र आम जनताको लागि छैन। अहिले मुठ्ठीभर दलाल पूँजीपतिको लागि मात्रै गणतन्त्र बनिराखेको छ। देशका शोषकहरूको गणतन्त्र बनिरहेको छ। जनताको गणतन्त्र बन्न सकिरहेको छैन।’ साथै उनले भिजिट भिसा प्रकरणमा धेरैको योजनासाथ धन्दा चलिरहेको बताए। उनले एउटालाई मात्र बलिको बोको बनाएर अन्यलाई चोख्याउन खोजेको आरोप लगाए।
बिएल संवाददाता - काठमाडौं
