नेपाल कम्युनिष्ट पार्टी (नेकपा) ले जिल्लाका पुरानै इन्चार्जहरूलाई जिम्मेवारी दिनेगरी मापदण्ड तय गरेको छ।

प्रधानमन्त्री एवम् पार्टी अध्यक्ष केपी शर्मा ओली, अर्का अध्यक्ष पुष्पकमल दाहाल ‘प्रचण्ड’  र नेता माधवकुमार नेपालबीच निरन्तर भएका छलफलहरूबाट उक्त सहमित भएको हो।

‘पहिले जिल्ला अध्यक्ष र सचिव तोक्दा अपनाइएको मापदण्डअनुसार नै अब इन्चार्ज र सहइन्चार्जहरुको टुंगो लगाइनेछ,’ एक सचिवालय सदस्यले सेतोपाटीसँग भने।

पहिलेकै मापदण्डमा जाँदा अब पूर्वएमालेका तर्फबाट जिल्ला इन्चार्ज भएको ठाउँमा पूर्वमाओवादीका सहइन्चार्ज र पूर्वमाओवादीका तर्फबाट इन्चार्ज तोकिएका ठाउँमा पूर्वएमालेका नेता सहइन्चार्ज हुनेछन्।