प्रहरीले बलात्कार गरेको आरोपमा राष्ट्रिय अनुसन्धान विभागको एक सूचकलाई पक्राउ गरेको छ। पक्राउ पर्नेमा दाङ राप्ती गाउँपालिकाका दामोदर पौडेल रहेका छन्। 

३३ वर्षीया युवतीलाई विवाहको आश देखाई जबर्जस्ती गरेको आरोपमा पौडेललाई काठमाडौँ प्रहरीले पक्राउ गरेको हो। पीडितले दिएको किटानी जाहेरीको आधारमा प्रहरीले पौडेललाई असार ७ गते पक्राउ गरि थप अनुसन्धान गरिरहेको छ। 

सामाजिक सञ्जालबाट चिनजानमा आएका पौडेलले युवतीलाई विवाहको आश देखाई २०७९ भदौ १६मा हनुमास्थानस्थित डेरामा बोलाई बलात्कार गरेको पीडितको जिकिर छ। 

पीडितले जाहेरीमा ‘विवाह गर्छु भनेर इच्छा विपरीत’ बलात्कार गरेको र घटनाबारे कसैलाई भनेमा तेरो आमाको ज्यान समेत लिन्छु।’ भनेकाे उल्लेख गरेकी छिन्। 

हाल प्रहरीले उक्त प्रकरणमा अनुसन्धान अघि बढाएपछि राष्ट्रिय अनुसन्धान विभागले उनलाई निलम्बन गरेको छ। प्रहरीका अनुसार ३५ वर्षीय पाैडेल कानून व्यवसायी समेत हुन्।