नुवाकोटको दुप्चेश्वर गाउँपालिका–४ बेतिनीस्थित छेवाङ ग्लान ङारछ्यालिङ गुम्बामा ‘गुरु पद्मसंभव’को मूर्ति प्राण प्रतिस्थापन गरिएको छ।

स्थानीयवासीको श्रम र आर्थिक सहयोगसहित स्थानीय तह र बागमती प्रदेश सरकारको सहयोगमा निर्माण गरिएको ‘गुरु पद्मसंभव’को मूर्ति अर्थमन्त्री डा. प्रकाशरण महतले शनिवार प्रतिस्थापना गरेका छन्।

सो अवसरमा उनले बुद्धपछिको बुद्ध भगवान्का रूपमा सम्मानित भगवान् पद्मसंभवको मूर्तिको स्थापनाले धार्मिक र सांस्कृतिक संरक्षणमा महत्त्वपूर्ण सहयोग पुग्ने बताए।

‘दण्ड–जरिवाना गराउने कानुनभन्दा नैतिकवान् बनाउने धर्म, संस्कार र मान्यताले हामी चलेका छौँ’, उनले भने, ‘हजारौँ वर्षदेखि मानिस एक अर्काप्रति सद्भाव कायम राख्दै जीवन चलाइरहेका छौँ। त्यो हाम्रो महान् धर्म, संस्कृति र त्यसले सिकाएको पाठको नतिजा हो।’

एक हजार दुई सय वर्षअघि बुद्ध धर्मको प्रचारका लागि विशेष गरेर तिब्बत र नेपाली भूमिमा समेत योगदान पुर्याएका ‘गुरु पद्मसंभव’लाई बौद्ध धर्मावलम्बीले सिद्धार्थ गौतम बुद्धपछिको ‘दोस्रो ठुलो भगवान्’को अवतारका रूपमा पुज्ने गरेका छन्।

बेतिनीस्थित नाम्सापुरानमा करिब १० रोपनी जग्गामा फैलिएको ‘गुरु पद्मसंभव’को मूर्ति निर्माणका लागि ७० लाख २० हजार लगानी भएकाले अझै थप व्यवस्थित बनाउन बाँकी रहेको गुम्बा व्यवस्थापन समितिका सल्लाहकार योविन्द्रसिंह तामाङले बताए।

उनका अनुसार दुप्चेश्वर गाउँपालिका र बागमती प्रदेश सरकारमार्फत करिब रु ३८ लाख प्राप्त भएको र बाँकी ३२ लाखभन्दा बढी रकम स्थानीयवासीले चन्दा सङ्कलन गरेर मूर्ति निर्माण गरिएको हो।  

‘बेतिनीका छ सयभन्दा बढी घरधुरीको साझा सम्पदाका रूपमा निर्माण गरिएको पद्मसंभवको मूर्ति नै यस क्षेत्रको पहिलो र बौद्ध मार्गीको एक मात्र आस्थाको केन्द्र हो’, दुप्चेश्वर गाउँपालिकाको निवर्तमान अध्यक्षसमेत रहनुभएका उनले भने, ‘पद्मसंभवको मूर्तिसँगै अब प्राचीन तथा ऐतिहासिक इतिहास बोकेको यहाँको छेवाङ ग्लान ङारछ्यालिङ गुम्बाको निर्माण गर्दै बौद्ध दर्शन अध्ययन केन्द्रको स्थापना गर्ने लक्ष्य छ।’

उक्त स्थान नजिकै कुण्ड र डम्फूपार्कको समेत स्थापना गरिएकाले धार्मिक पर्यटनको प्रवर्द्धनमा समेत सहयोग पुग्ने गुम्बा व्यवस्थापन समितिका अध्यक्ष मुबिन्द्रसिंह तामाङले बताए।

बुद्ध जयन्ती पर्वका अवसर बनाई विशेष पूजाआरधनासहित निर्माण गरिएको ‘गुरु पद्मसंभव’को मूर्ति प्राण प्रतिस्थापनमा बौद्ध गुरु प्रमुख लामा डोल्पु गुम्चेन रिन्पोछेसहित नौ जना लामा गुरुबाट बुम्पा, छोक छ्याङ, बुन्छु, रिल्बु, दादर गर्दै वाङ (प्रसाद र दीर्घायुको कामना) वितरण गरिएको थियो।

तीन दिनसम्म सञ्चालित पूजाको समापन आज हुँदै छ। उक्त समारोहमा शनिवार सम्म पाँच हजार बौद्ध मार्गीको सहभागिता रहेको गुम्बाका प्रमुख लामा पासाङ लामाले जानकारी दिए।

जिल्लाको विकट र तामाङ–शेर्पा समुदायको बसोबास रहेको उक्त स्थानसम्म पुग्न सडक यातायातको पहुँच कमजोर भएकाले पद्मसंभवको मूर्ति प्राण प्रतिस्थापन गर्न शनिवार अर्थमन्त्री डा. प्रकाशरण महत हेलिकोप्टरमार्फत कार्यक्रम स्थलमा पुगेका थिए।

उक्त अवसरमा उनले सम्बोधन गर्दै सो स्थानसम्म पुग्ने निर्माणाधीन त्रिशूलीस्थित गङ्गटेबाट समुन्द्र टार हुँदै गोल्फुभञ्याङसम्म जोड्ने सडक कालोपत्रे गर्न आवश्यक बजेट समावेश गर्न लागेको र काठमाडौंबाट शिवपुरी (खोलेगाँउ, महाकाली) हुँदै सिधै दुप्चेश्वरसम्म पुग्ने सडकको ट्र्याक निर्माण गरिने प्रतिबद्धता जनाएसँगै स्थानीयवासी उत्साहित भएका छन्।