राष्ट्रिय महिला आयोग संवैधानिक आयोगमध्येको एक हो । संविधान बनेपछि यो आयोग चार वर्षसम्म पदाधिकारीविहीन रह्यो । पूर्ववर्ती ओली सरकारले आफ्नो कार्यकालको अन्तिम घडीतिर आइपुग्दा ०७७ माघ २१ गते आयोगको अध्यक्षमा एमाले नेतृ कमलाकुमारी पराजुली नियुक्त भइन् ।
पराजुलीसँगै आयोगका सदस्यहरूमा ओली सरकारले कृष्णकुमारी पौडेल खतिवडा र विद्याकुमारी सिन्हालाई नियुक्त गर्यो । गत असार १० गते आयोगका बाँकी सदस्यमा जया घिमिरे र सावित्रा कुमारी शर्मा थपिए । अहिले महिला आयोगमा ५ पदाधिकारीहरू त छन् तर, अध्यादेशमार्फत असंवैधानिक तरिकाले नियुक्त गरिएको भन्दै सर्वोच्च अदालतमा मुद्दा परेको छ । अदालत आफैँ विवादमा रुमलिएका कारण संवैधानिक आयोगको नियुक्तिसम्बन्धी रिट अहिलेसम्म विचाराधीन अवस्थामै थन्किएको छ ।
असंवैधानिक तरिकाबाट नियुक्ति पाएको आरोप खेप्दै आएका महिला आयोगका पदाधिकारीहरूले कसरी काम गरिरहेका छन् त ? यिनै विषयमा कुराकानी गर्न रातोपार्टीकर्मी महिला आयोगमा पुग्दा आयोगकी सदस्य कृष्णकुमारी पौडेल खतिवडा भेटिइन् । उनले भनिन्, ‘नियम, कानुन, विधिसम्मत हामी पदाधिकारी आएका हौँ । अदालतले के निर्णय गर्छ, थाहा छैन । तर, हामी जतिञ्जेल आयोगमा बस्छौँ, त्यतिञ्जेल चित्तबद्ध भएर महिलाका विषयमा काम गर्छौँ । संवैधानिक आयोग भएकाले जुन पार्टीको सरकार आए पनि संविधानअनुसार काम गर्छौँ ।’
