मदन ढुङ्गाना
हनी ट्रयाप भन्नेबित्तिकै हामी परिबन्दमा पारेर ठगी र शोषण गर्ने महिलालाई सम्झन्छौँ । कुनै पुरुषलाई फसाएर यौन क्रियाकलापमा संलग्न गराउने र अन्त्यमा पैसाका लागि ब्ल्याकमेल गर्ने प्रवृत्तिलाई प्रायः ‘हनी ट्रयाप’ भन्ने गरिन्छ । र, यसमा अक्सर महिलालाई नै दोषी देखाउने गरिन्छ । तर, महिलाअधिकारकर्मीहरुको विश्लेषणमा ‘हनी ट्रयापिङ’ मा महिला मात्र होइन, पुरुषहरु पनि उत्तिकै दोषी छन् ।
पछिल्लो समय नेपालमा हनी ट्रयापका घटना बढ्न थालेका छन् । प्रहरी कार्यालयहरुमा हनी ट्रयापका उजुरीहरु दैनिक रुपमा आउन थालेका छन् । सामान्यतः हनी ट्रयापबाट पीडित बनेको भन्दै पुरुषहरु प्रहरी कार्यालयमा पुग्ने गरेको भए पनि हनी ट्रयापबाट महिला पनि उत्तिकै पीडित भएको महिला अधिकारकर्मीको भनाइ छ ।
अधिवक्ता एवं महिला अधिकारकर्मी मोहना अन्सारी महिलाले गर्ने हनी ट्रयाप वा पुरुषले गर्ने हनी ट्रयाप दुबै आपराधिक कार्य भएको बताउँछिन् । तर, हनी ट्रयाप भन्नेबित्तिकै महिलालाई मात्रै दोषी देख्ने परिपाटी भने गलत भएको उनी बताउँछिन् ।
