सुनुवाईबिनै भारतीय जेलमा ४० वर्ष बिताएर घर ल्याइएका माई नगरपालिका–१०, लुम्बकका ६१ वर्षे दुर्गाप्रसाद तिम्सिना मेची राजमार्गको जौबारीमा फेला परेका छन्।
आइतबार साँझ सम्पर्कविहिन भएका उनलाई घरबाट करिब ४ घन्टाको पैदल दूरीमा रहेको जौबारीमा प्रहरीले फेला पारेको हो।
केही सातादेखि उनको स्वास्थ्य अवस्था असामान्य बन्दै गएको उनको भतिजो गोपालले बताए। इलामको तत्कालीन एकतप्पा गाउँ पञ्चायत–८ खँगुवा ९ (हाल फाकफोकथुम गाउँपालिका) बाट २०३७ साल माघमा मंगलबारे बजारको बुधबारे हाटमा तोरी बेच्न भनी हिँडेका उनी भारतीय जेलमा पुगेका थिए।
गत चैत ७ गते रिहा भएर उनलाई नेपाल ल्याइएको थियो। कोलकाता हाइकोर्टले महावाणिज्य दूतावासमार्फत् ६/६ महिनामा दुर्गाप्रसादको स्वास्थ्य अवस्थाबारे जानकारी गराउने गरी रिहा भएका थिए।
