म्यानमारको जेड पत्थरको खानीमा पहिरो जाँदा कम्तीमा १ सय ६२ जनाको मृत्यु हुनुको साथै दर्जनौं मानिसहरू वेपत्ता भएका छन्। सिएनएनका अनुसार निरन्तरको भारी वर्षापछि आएको पहिरोले बिहीबार विहान सो संख्यामा हताहती भएको हो।

म्यानमारको उत्तरमा रहेको काचिन राज्यमा भएको घटनाबाट अग्नि नियन्त्रण विभागले बिहीबार साँझसम्म १ सय ६२ वटा मृतकको शव फेला पारेको जनाइएको छ। घटनामा घाइते भएका ५४ जनालाई उपचारका लागि अस्पताल भर्ना गरिएको छ।

घटनामा मर्नेको संख्या अझै बढ्न सक्ने अनुमान गरिएको छ। उद्धारमा वर्षाले असर गरेपछि उद्धार स्थगीत गर्नुपरेको पनि सिएनएनले जनाएको छ।

म्यानमारका बहुमूल्य पत्थरका खानीहरूमा यस्ता घटना थुप्रैपटक घट्ने गरेको छ। जेड पत्थरका खानीहरूको उचित नियमन नहुँदा यस्ता घटना हुने गरेका छन्।