जनकपुरधामस्थित जानकी मन्दिरमा बम भएको हल्ला फैलिएपछि प्रहरीले झण्डै एक घण्टाभन्दा बढी समय चेकजाँच गरेको छ ।

प्रहरीको बाक्लो उपस्थितिमा मन्दिर भित्रबाट पुजारी र मन्दिरको प्राङ्गणमा व्यापारी व्यवसायी र श्रद्धालु भक्तजनहरुलाई समेत मन्दिर परिसरबाट हटाइएको थियो । प्रहरीका अनुसार मन्दिरमा बम रहेको भनी कसैले फोन गरेपछि केही आधुनिक यन्त्र लिएर खोजी कार्य गरिएको धनुषाका प्रहरी प्रमुख एसपी शेखर खनालले बताए ।

खनालले प्रहरीका साथै विस्फोटक पदार्थ पत्ता लगाउने कुकुरलाई समेत ल्याई चेकजाँच गरिएको बताए । यद्यपी कतै केही फेला नपरेको उनले बताए ।उनले विस्फोटक पदार्थ फेला नपरेपछि मन्दिर खुल्ला गरिएको बताए । ‘हामीले केही बेर दर्शनार्थीसहितकाई परिसर बाहिर राखेर चेकजाँच गर्‍यौं र, अहिले पुनः दर्शनका लागि खुल्ला गरेका हौं ।’