धादिङमा शुक्रबार बिहान भएको यात्रु बस दुर्घटनामा मृतकको संख्या सात पुगेको छ।
सर्लाहीको सदरमुकाम मलंगवाबाट काठमाडौं आउँदै गरेको ना ६ ख ७४६९ नम्बरको बस धादिङको बेनिघाट रोराङ गाउँपालिका-३ सलाङघाटबाट बिहान सवा ३ बजेतिर त्रिशूली नदीमा खसेको थियो।
धादिङको बेनिघाट रोराङ गाउँपालिका वडा नम्बर–३, सलाङघाटस्थित त्रिशूली नदीमा बस खसेर दुर्घटना भएको हो ।
धादिङ जिल्ला प्रहरी कार्यालयका अनुसार अहिलेसम्म ७ जनाको शव भेटिएको छ।
मृत्यु हुनेमा सर्लाहीका ३५ वर्षीय अजय दास, सर्लाहीकै २५ वर्षीय विजय कुर्मी छन् । अर्का एकजना मृतकको भने सनाखत हुन सकेको छैन । उनीहरु तीनैजनाको घटनास्थलमा मृत्यु भएको हो ।
चितवनको जुगेडीमा एक, मुग्लिनमा एक र देवघाटमा दुई जनाको शव फेलापरेको प्रहरीले जनाएको छ। उनीहरुको पनि सनाखत हुन सकेको छैन ।
बसमा ४५ जना सवार थिए । जसमा बसचालक र दुईजना सहचालक रहेको प्रहरीले जनाएको छ ।
सडकबाट करिब १०० मिटर तल त्रिशूली नदीमा खसेको बसलाई क्रेनको सहायताले नदीबाट निकालेर किनारमा ल्याइएको छ । तर, बसभित्र कोही पनि नभेटिएको प्रहरीले जनाएको छ ।
बसमा सवारमध्ये २२ यात्री बेपत्ता रहेको प्रहरीले जनाएको छ ।
दुर्घटनामा परेकामध्ये १६ जनाको जीवितै उद्धार गरिएको थियो। उनीहरुलाई थप उपचारका लागि काठमाडौं पठाइएको छ ।
कुरिनटारस्थित सशस्त्र प्रहरी बलको गोताखोर टोलीसमेत परिचालन गरेर दुर्घटनाका बेपत्ताहरुको खोजीकार्य भइरहेको प्रहरीले जनाएको छ ।
बसमा सर्लाहीको मलंगवाबाट चलानी हुँदा ३८ जना यात्री रहेको प्रहरीले जनाएको छ । बसका यात्रीकाअनुसार बाटोमा केही यात्री थपिएका थिए ।
.jpg)
