पर्साको विन्दवासिनी गाउँपालिका-३ झौवागुठीमा बनाईएको इदगाहको खर्च विवरण वडाअध्यक्षसँग स्थानीयले मागेपछि उत्पन्न विवादमा दोहोरो झडप भएको छ।
झडपमा वडाअध्यक्षका श्रीमानले स्थानीयलाई धम्क्याउँदै पिटेका छन्।
विन्दवासिनी गाउँपालिका वडा नम्बर ३ झौवागुठीका वडा अध्यक्ष सलमा खातुनका श्रीमान हनिफ अन्सारीले हिसाव माग गर्ने मकबुल राउत कुर्मीलाई बाँसको भाठाले प्रहार गरेपछि स्थानीय आक्रोशित भएका थिए ।
झडपको क्रममा समिन गद्दी, नागिना खातुन, सहरुम राउत गद्दी लगायतका व्यक्तिहरु घाइते भएका छन्।
इदगाह निर्माणका लागि तत्कालिन सांसदका उम्मेदवार हरिनारायण रौनियारले ४ हजार इँटा र ४० वटा तयारी पिलर उपलब्ध गराएका थिए।
इदगाह निर्माण स्थलमा रहेको ६० हजारमा रुख बेचेको पैसासमेत उपभोक्ता समितिको नाममा वडा अध्यक्ष सलमा खातुनको श्रीमान हनिफ अन्सारीले गाउँपालिकाले दिएको ५ लाख बजेटमा जोडेपछि विवाद भएको थियो।
उपभोक्ता समितिको नाममा इदगाह निर्माणमा २ लाख भन्दा बढीको घोटाला गरेपछि स्थानीयले हिसाव माग गर्दा झडप भएको पीडित सहरूम राउत गद्दीले बताए।
झडपपछि अमरपट्टि प्रहरी चौकीले हनिफ अन्सारी र मकबुल राउत गद्दीलाई पक्राउ गरी जिल्ला प्रहरी कार्यालय पर्सामा पठाएको छ ।
हिसाव माग्दा कुटपिट गर्ने हनिफलाई कारबाहीको माग गर्दै सोमबार दिउँसो झौवागुठीबाट जिल्ला प्रहरी कार्यालय आई पुगेका स्थानीयले प्रहरी कार्यालयमा समेत धर्ना दिएका थिए।
.jpg)
