उनले कहिल्यै पनि सोचेकी थिइनन् कुनै दिन किसानसँग प्रत्यक्ष जोडिनेछु भनेर । विवाहलगत्तै परिवारको व्यापारिक बिरासत थाम्न अघिसरेकी लतिका गोल्यान यतिबेला गोल्यान ग्रुपकी शान बनेकी छिन् ।
परिवारका महिला सदस्य सबै गृहिणीको रूपमा नै बस्ने चलन । लतिकालाई पनि गृहिणीकै रूपमा आरामको जिन्दगी जिउन, ब्यापारको टाउको दुखाईं नलिन परिवारले नभनेका होइनन् तर उनीभित्रको उद्यमी क्षमता र चेतना किन चुप बस्थ्यो ? उनको पढाइ, व्यक्तित्व र माइतमा पनि बुबाको ब्यापारमा सघाएको अनुभवले उनलाई घरको व्यापारमा सहभागी हुने हुटहुटी जाग्यो । पारिवारिक व्यवसायलाई पुरुषसरह नेतृत्व दिएर विशाल भवनको छायामा मुस्कुराएकी उनै लतिका गोल्यानले हाउजिङ परियोजना मात्रै होइन प्रत्यक्ष रूपमा किसानसँग जोडिएर माटो ब्रान्डको अर्गानिक प्रोडक्ट बजारमा ल्याएकी छिन् ।
लतिकाले परिवारलाई आफू व्यवसाय गर्न सक्षम छु भनेर प्रमाणित गरिन् । उनले परिवारलाई आफूले व्यवसायको नेतृत्व लिन, छोरासरह काम गरेर आत्मनिर्भर बन्न, घर अनि अफिस सँगसँगै हेर्न सक्छु भनेर कन्भिन्स गराइन् । उनको यो उत्साहलाई अन्ततः परिवारले साथ दियो ।
यदि कोही महिलालाई घर बाहिर निस्किन गाह्रो छ भने आफ्नो परिवारलाई महिला पनि आत्मनिर्भर हुन सक्छन्, काम गर्न सक्छन्, समाजमा उदाहरणीय बन्न सक्छन् भन्नेबारे बुझाएर बाहिर निस्किन आग्रह गर्छिन् लतिका ।
लतिका छोरीहरुलाई सानैदेखि आत्मनिर्भर बन्न र छोराछोरी बराबार हुन् है भन्ने भावनाको विकास गराउन जरुरी देख्छिन् । छोरा या छोरी भएकै कारण खुम्चिनु नपरोस् ।
भारतको चेन्नईमा जन्मेहुर्केकी लतिका २१ वर्षको उमेरमा गोल्यान परिवारकी बुहारीका रूपमा नेपाल भित्रिइन् । १५ वर्ष वितिसकेको छ नेपालमा । दुई छोरा छोरीकी आमा लतिकाले आजसम्म आफ्नो काममा अवरोधको सामना गर्नुपरेको छैन । दृढ इच्छाशक्ति र लगनशीलताले आज उनलाई व्यवसायमा मात्रै होइन प्रत्यक्ष समाजसँग पनि जोडिन सहयोग गरेको छ ।
