असार पाँच गते कुमार पौडेल दोहरो भिडन्तमा परेको खबर पाएलगत्तै बाबु खिलकराज र भाइ हरिकृष्ण जिल्ला प्रहरी कार्यालय सर्लाहीतिर दौडिए।
प्रहरीकहाँ पुग्दा 'यहाँ त होइन जिल्ला अस्पतालमा' भन्ने जानकारी पाए। लगत्तै हान्निएर अस्पताल पुगे। अस्पतालसम्म पुग्दा पनि खिलकराजलाई लागेको थियो - छोरो ज्युँदै छ।
तर, उनले चाहेअनुसार हुने कुरा थिएन, जे भइसकेको थियो त्यसलाई सहनुको विकल्प थिएन उनीसामु।
अस्पतालमा पुगेपछि मुखमात्र हेर्ने चाहना प्रकट गरे पनि पूरा हुन सकेन। त्यसपछि त उनी शव बुझ्ने मुडमा नै रहेनन्।
'यथार्थमा के भएको हो जानकारी नपाउँदासम्म शव नबुझ्ने भनेको थिएँ,' खिलकराजले भने, 'मारी त हाले अब त्यसलाई जलाउनु र नजलाउनुमा के थियो र?'
उनी जान्न चाहन्थे कसरी र किन मारिए कुमार?
'घटना भएको के हो थाहा छैन। हामीलाई शव भन्दा पनि यथार्थ के भएको हो त्यसबारे जान्नु थियो अझै कसैले के हो भनेका छैनन्,' खिलकराजले भने।
घटनाको भोलिपल्ट रिपोर्ट आउन ढिलो हुने भयो भन्दै हतारमा शव बुझ्न दवाव दिइयो। भाइ हरिकृष्ण भन्छन्, 'मानव अधिकार आयोगका प्रतिनिधिको रोहवरमा शव बुझ्यौं।'
कुमारका बुबा खिलकराज सुरुदेखि नै शव नबुझ्ने अडानमा थिए। मानव अधिकार आयोगका प्रतिनिधिहरु नै रोहवरमा बस्ने र घटनाको निष्पक्ष छानविन गर्ने विश्वास दिलाएपछि भाइ हरिकृष्णले शव बुझे।
'हामीलाई पोस्टमार्टम रिपोर्ट दिएनन्। मानवअधिकार आयोगका प्रतिनिधिहरुको रोहवरमा शव बुझेका हौँ,' उनले भने।
शव परीक्षणपछि राष्ट्रिय मानव अधिकार आयोगको २ नं प्रदेशका प्रतिनिधिहरुको रोहवरमा 'एउटा कागज' मा हस्ताक्षर गरी हरिकृष्णले शव बुझेका थिए। बुझे लगत्तै दाह संस्कार पनि गरे।
सर्लाहीमा प्रहरीसँगको मुठभेडमा मृत्यु भएका भनिएका नेत्र विक्रम चन्द 'विप्लव' नेतृत्वको नेपाल कम्युनिस्ट पार्टीका सर्लाही जिल्ला इन्चार्ज कुमार पौडेलको पोस्टमार्टम रिपोर्ट घटना भएको डेढ महिना बितिसक्दा पनि उनका आफन्तले प्राप्त गरेका छैनन्।
+++
दोहोरो भिडन्त भनिए पनि कुमारको मृत्युमाथि प्रश्न उठ्यो। घटनाको छानविन गर्न गृह मन्त्रालयले छानविन समिति गठन गर्यो। त्यो टोली घटनाको अनुसन्धानका लागि सर्लाही पनि पुग्यो। तर, प्रत्यक्षदर्शीसमेत फेला पार्न सकेन। केही स्थानीय तथा जनप्रतिनिधिसँग भेट गरेर गृहको अनुसन्धान टोली फर्कियो।
यसरी फर्किएको टोलीले घटनामा संलग्न प्रहरीहरुसँग कुरा गर्यो। त्यही आधारमा प्रतिवेदन तयार पार्यो।
त्यो प्रतिवेदनमा कुमार पौडेलको मृत्यु दोहोरो भिडन्तमा भएको गृहमन्त्री रामबहादुर थापाले संसदमा जानकारी दिए।
'लालबन्दीबाट सिन्धुलीतर्फ जाँदै गर्दा कुमार पौडेलको प्रहरीसँग जम्काभेट भयो। उनका साथीहरुले प्रहरीतर्फ फायर गर्दै जंगलतर्फ भागे। कुमार पौडेलले पनि प्रहरीलाई लक्षित गरी फायर गरेका थिए। उनको हानेको मिस फायर भयो। जवाफी कारवाहीमा कुमार पौडेलको मृत्यु भयो,' प्रतिवेदनलाई उदृत गर्दै गृहमन्त्री थापाले भनेका थिए।
प्रहरीको सर्वाधिक खोजीको सूचीमा रहेका पौडेल विध्वंसात्मक गतिविधिमा संलग्न भएको छानविन समितिले जनाएको छ। उनको निगरानीका लागि केन्द्रबाट विशेष प्रहरी फोर्स, केन्द्र र जिल्लास्तरबाट समेत प्रहरी परिचालन गरिएको गृहमन्त्री थापाले भनेका थिए।
