काठमाडौँ । पहिलो पटक नेपालमा भारतदेखि पाइपलाइनमार्फत तेल आपूर्ति भएको छ । शुक्रबार औपचारिक रूपमै पाइपमार्फत तेलको सहज आपूर्ति भएपछि पाइप लाइनको सफलता देखिएको हो ।
गत बिहीबार इन्डियन आयल कर्पोरेसन (आईओसी)ले पाइपलाइनमार्फत पठाएको पानी र तेल शुक्रबार एकैसाथ नेपाल आइपुगेको थियो ।
औपचारिक रूपमै तयारी पूरा गरेर तेल आपूर्तिलाई सहज गर्न नेपाल आयल निगम र इन्डियन आयल कर्पोरेसनले पाइपको परीक्षणका लागि पहिलो चरणमा पानी र तेल पठाएको हो । आईओसीले परीक्षणका लागि भन्दै बिहीबार बिहान १० बजे साढे ६ सय किलोलिटर पानी र ३१ सय किलोलिटर डिजेल पाइपमार्फत नेपाल पठाइएको थियो ।
परीक्षणाका रूपमा भारतदेखि पठाइएको पानी र तेल करिब २२ घण्टा लगाएर शुक्रबार बिहान ८ः३० बजे नेपालस्थित अमलेखगन्ज डिपोमा आइपुग्यो । यसरी भारतबाट पाइपमार्फत पठाइएको तेल सहज रूपमा नेपाल आपूर्ति भएपछि यतिखेर मोतीहारी–रक्सौल–अमलेखगञ्ज पाइप लाइनको चर्चा चुलिएको छ ।
अन्ततः पाइपबाटै अन्तरदेशीय तेल ढुवानी हुने भएपछि यतिखेर नेपाल–भारत व्यावसायिक तेल कारोबारमा नयाँ कोर्सको सूत्रपात भएको छ । अब नेपाल आयल निगम (एनओसी)ले पाइपबाटै तेल आपूर्ति गर्ने भएको छ भने उता इन्डियन आयल कर्पोरेसन (आईओसी)ले पनि पाइपबाटै तेल नेपाललाई पठाउने भएको छ । यसका लागि दुवै देशका व्यावसायिक पार्टनर नेपाल आयल निगम (एनओसी) र इन्डियन आयल कर्पोरेसन (आईओसी)ले तयारी पूरा गर्दै छन् ।
