काठमाडौंमा एक जना अग्लो मानिस प्रायः ‘फिस्टे’ कार चढेर हुइँकिरहेका भेटिन्छन्। साथीहरूले गिज्याउँदा र आफन्तले प्रश्न गर्दा पनि १५ वर्षदेखि यसरी फिस्टे कारमा सयर गर्न रुचाउने अग्ला व्यक्ति हुन् पत्रकार कुन्द दीक्षित। नेपाली टाइम्स अँग्रेजी साप्ताहिकका सम्पादक दीक्षित पहिला रेभा चढ्थे, अहिले महिन्द्राको ‘ई–२०’ चढ्छन्। यी दुबै बिजुली कार हुन्।
दीक्षितका अनुसार १५ वर्षअघि बैंङलोरबाट आएका चारवटा कार नेपाल छिर्ने क्रममा भन्सारमा अड्किए र चार वर्ष त्यत्तिकै रहे। पछि तीनलाई ‘रिकन्डिसन’ गरेर ल्याइयो। तिनै चार वटा रेभामध्ये एक थियो दीक्षितले चढ्ने फिस्टे कार।
नेपालमा फिस्टे कारबाट सुरु भएको बिजुली गाडीको कथा अहिले लामो बनिसकेको छ। राष्ट्रपति विद्यादेवी भण्डारी, ऊर्जामन्त्री वर्षमान पुन, नेपाल विद्युत् प्राधिकरणका कार्यकारी निर्देशक कुलमान घिसिङलगायतका उच्च पदस्थहरू समेत अहिले बिजुली कारमा सयर गर्न थालेका छन्।
