काठमाडौं– प्रहरी महानिरीक्षक (आइजिपी) सर्वेन्द्र खनालले ट्राफिक जाम व्यवस्थापनका लागि व्यवहार परिवर्तन गर्नुपर्ने बताएका छन्।
महानगरीय ट्राफिक प्रहरी महाशाखाको सडक सभ्यता सम्बन्धी तीन महिने कार्यक्रमको समीक्षा समारोहलाई सम्बोधन गर्दै महानिरीक्षक खनालले जामका लागि समय व्यवस्थापन गर्ने बानी बसाल्न सुझाव दिएका हुन्।
‘हामी घरबाट ढिला निस्किने, ढिलो हुँदा ट्राफिक जाममा परियो भन्ने?’ आइजिपी खनालले प्रश्न गरे, ‘काममा हिड्दा अलिकति मार्जिन राखेर हिड्नुपर्यो। ट्राभल टाइम राख्ने गरौं।’
जाम व्यवस्थापनमा ट्राफिक प्रहरी लागिरहेको भन्दै यसमा समाजको पनि उल्लेख्य दायित्व रहने बताए। धेरैले विदेशमा नियम कडा भएको र यहाँ पनि बनाउन सुझाव दिएको भन्दै आइजिपी खनालले जबसम्म नागरिक, सवारी चालक आफैं विवेकपूर्ण हिसाबले सचेत बन्दैन तबसम्म व्यवस्थापन नहुने जिकिर गरे। उनले आफूहरु ट्राफिक लाइटको व्यवस्थापनसँगै नियमबारे जनचेतनालाई प्राथमिकता दिएर अघि बढिरहेको बताए।
