'गुठी नेपालबाट सुरु भएको आफ्नै मौलिक दर्शन हो।'
पशुपति विकास कोषका पूर्व सदस्य सचिव डा गोविन्द टण्डनले दुई साताअघि व्याख्या गरिरहँदा सरकारले गुठीलाई व्यवस्थित गर्ने नाममा संसदमा विधेयक दर्ता गराएको धेरैलाई थाहा थिएन।
सरकारले राष्ट्रिय सभामा 'छापामार शैलीमा भूमाफियालाई हित हुने गरी' गुठी सम्बन्धी कानुनलाई एकीकरण र संशोधन गर्न बनेको विधेयक दर्ता गराएको थाहा पाएलगत्तै नेपाल गुठी संरक्षण पुच:ले काठमाडौंमा छलफल आयोजना गरेको थियो।
पुच: का संयोजक त्रिभुवन विश्वविद्यालयका पूर्व उपकूलपति केदारभक्त माथेमाले गुठी हरणको श्रृखंला रणबहादुर शाहको पालादेखि भएको बताउँदै वर्तमान सरकार त्यही दिशामा अग्रसर भइरहेको बताएका थिए। रणबहादुर शाहको मानसिक अवस्था आफ्नी कान्छी श्रीमतीको मृत्युपछि बिग्रिएको थियो। त्यसपछि उनले काठमाडौं उपत्यकामा रहेका धेरै गुठीका जग्गा र मन्दिरहरु कब्जा गरेका थिए। अहिले के पी शर्मा ओलीको दुई तिहाई सरकार आएपछि फेरि गुठीका जग्गा र मन्दिरहरु हडप्ने प्रयत्न भएको उनले बताएका थिए।
