ब्रिटिस गोर्खामा भर्ती हुने सपना साँचेका नगेन्द्र गुरुङका लागि लाहुरे बन्ने यो वर्ष अन्तिम मौका हो। यस पटक भर्ती नभए उनको वर्षौंको मिहिनेत र लगानी खेर जानेछ। प्रतिस्पर्धाका लागि धरान–पोखरा आउजाउ एवं प्रशिक्षणका लागि उनले हरेक वर्ष एक लाख रुपैयाँभन्दा बढी सिध्याएका छन्।
खोटाङ रावाबेँशी गाउपालिका–६ का बासिन्दा उनी अहिले २० वर्षका भए। आगामी वर्ष २१ वर्ष लाग्ने हुनाले उनले अर्को वर्ष ब्रिटिस गोर्खामा प्रतिस्पर्धा गर्न पाउने छैनन्।
‘म मेरो बाउ बाजेको मान, सम्मान, इज्जतसँगै आफ्नो आमा बुबाको सपना र आफ्नो सपना पूरा गर्न लाहुरे बन्न चाहन्छु’ नगेन्द्र भन्छन्, ‘लाहुरेमा भर्ती भए मैले समाजमा प्रतिष्ठा सँगसँगै राम्रो जीवनयापनका लागि अति आवश्यक पैसा पनि कामाउनेछु तर लाहुरे बन्न सोचेजस्तो सहज छैन।’
