गएराति आएको भूकम्पबाट घाइतेहरुको उद्धारका लागि कर्णाली प्रदेश सरकार जुटिरहेको छ।

प्रदेशका आन्तरिक मामिला तथा कानुनमन्त्री एवम् सरकारका प्रवक्ता कृष्णबहादुर जिसीका अनुसार हवाई र स्थलमार्गमार्फत उद्धार कार्य हुन लागेको हो।

‘जाजरकोट र रुकुम पश्चिममा रहेका प्रादेशिक संरचनाहरुमार्फत उद्धार कार्य भइरहेको छ,’ उनले भने, ‘भिजिबिलिटी खुल्ने बित्तिकै उडान हुने गरी चिकित्सक टोली त्यसतर्फ जान तयारी अवस्थामा छ। मुख्यमन्त्रीसहितको टोली स्थलमार्गमार्फत जाने तयारी छ।’

मन्त्री जिसीका अनुसार सुर्खेत, नेपालगञ्ज र दाङबाट राहत तथा उद्धारका सामग्री पठाउने काम भइरहेको छ। साथै, प्रदेश विपद् व्यवस्थापन परिषद्को बैठक भर्खरै सम्पन्न भएको छ भने प्रदेश मन्त्रिपरिषद्को बैठक केही बेरमा बस्न लागेको मन्त्री जिसीले जानकारी दिए।

उनका अनुसार मन्त्रिपरिषद् बैठकले क्षेत्रगत जिम्मेवारी बाँडफाँड गरी राहत तथा उद्धार कार्यलाई प्रभावकारी बनाउने निर्णय गर्नेछ।