प्रमुख तीन दलका शीर्ष नेताहरूबीच बेपत्ता छानबिन तथा सत्य निरुपणसहित संसद्मा रहेका विधेयकलाई सहमतिमा अघि बढाउने विषयमा संवाद हुँदैछ।
प्रधानमन्त्री एवं माओवादी केन्द्रका अध्यक्ष पुष्पकमल दाहाल 'प्रचण्ड' र कांग्रेस सभापति शेरबहादुर देउवा विधेयकमा सहमति जुटाउन एमाले अध्यक्ष केपी शर्मा ओलीनिवास बालकाेट जाँदैछन्।
स्राेतका अनुसार उनीहरू बिहान ९ बजे बालकाेट जाने छन्। संवादका क्रममा संवैधानिक परिषद सम्बन्धी विधेयक, सत्य निरुपण तथा मेलमिलाप र बेपत्ता पारिएका नागरिक छानबिन सम्बन्धी विधेयकलाई अगाडि बढाउने विषयमा तीव्र छलफल गर्ने बताइएकाे छ।
विधेयक अघि बढाउने समझदारीका लागि ओलीनिवास बालकोटमा बिहान ९ बजे छलफल हुन लागेको प्रधानमन्त्रीको सचिवालयले जनाएको छ। विगत केहि दिनदेखि संवैधानिक परिषद् सम्बन्धी विधेयक र सत्यनिरूपण तथा मेलमिलाप र वेपत्ता पारिएका नागरिक छानबिन सम्बन्धी विधेयकलाई अगाडि बढाउन शीर्ष नेताहरूबीच छलफल भइरहेको छ।