नेकपा एमालेको १०औँ महाधिवेशन चितवनमा गर्ने तय भएपछि नेकपा माओवादी केन्द्रका अध्यक्ष पुष्पकमल दाहाल प्रचण्डले गृह जिल्लामा चार दिन बिताए। उनी आफ्नो निर्वाचन क्षेत्रमा पर्ने माडी र भरतपुरका विभिन्न कार्यक्रममा सहभागी भए। जनताको घर दैलो पनि गर्न भ्याए।
सत्तारुढ दलका नेतासमेत रहेका प्रचण्डले बिहीबार माडीको हनुमानझुला पुगेर सुकुमबासीलाई नागरिकता बाँडे। उनले सुकुमबासीलाई गठबन्धनको सरकारले छिट्टै लालपुर्जा दिने आश्वासन पनि दिए। नागरिकता बाँड्ने काम जिल्ला प्रशासन कार्यालयको भए पनि उनले नागरिकतालाई राजनीतिक स्वार्थसँग जोडे।
एमालेको महाधिवेशन तय र नेपाली कांग्रेस जिल्ला सभापति जीतनारायण श्रेष्ठको अभिव्यक्तिपछि प्रचण्ड केही झस्किएको जस्तो देखिन्छन्। विभिन्न चाडपर्वको शुभकामना आदानप्रदान गर्न शुक्रबार आयोजित कार्यक्रममा सहभागी भएका प्रचण्ड शुभकामना दिनुको साटो एमाले अध्यक्ष ओली र कांग्रेस जिल्ला सभापतिविरुद्ध खनिए।
उनले भने, ‘देशभरिको ध्यान चितवनमै केन्द्रित छ। चितवनमा चुनाव मात्रै हुनेवाला छैन। यहाँ ठूलो लडाइँ हुनेवाला छ। ठूलो टक्कर हुँदैछ।’ कार्यक्रममा बाबुछोरी नै एमाले र चितवन कांग्रसमाथि खनिए।
आगामी चुनावमा आफू र माओवादी केन्द्रलाई हराउने रणनीति बनाउनकै लागि एमालेले चितवनमा महाधिवेशन गर्न लागेको प्रचण्डले आशंका गरेका छन्। एमालेले गृह जिल्ला चितवन नै भएका रामबहादुर थापा बादललाई महाधिवेशन व्यवस्थापनको संयोजक बनाएको छ।
नेकपा विभाजनपछि पनि बादल एमालेमै बसेपछि बादल र प्रचण्डबीच दुष्मनी बढेको छ। बुटवलमा तय भइसकेको महाधिवेशन अन्तिम समयमा आएर चितवनमा गर्ने निर्णय भएको थियो। आगामी १०–१२ मंसिरमा हुने महाधिवेशनको बन्दसत्र नारायणी नदी किनार र बन्दसत्र सौराहामा हुँदै छ।
नेपाली कांग्रेसको संस्थापन इतर समूहले आगामी चुनावमा माओवादी केन्द्रसँग चुनावी गठबन्धन नगर्ने र रुख चिह्न बाहेक अन्त भोट नहाल्ने बताउँदै आएका छन्। कांग्रेस जिल्ला सभापति जीतनारायण श्रेष्ठले त केही दिनअघि प्रचण्ड र रेनु दाहाललाई चितवनबाट लखेट्ने अभिव्यक्ति नै दिए।
श्रेष्ठको अभिव्यक्तिलाई प्रचण्डले वर्गीय स्वार्थ बाहेक अरू केही नभएको बताए। २०७४ सालमा भएको स्थानीय तहको निर्वाचनमा कांग्रेस र माओवादीबीच चुनावी गठबन्धन बनेको थियो।
भरतपुर महानगरपालिकाको प्रमुखमा रेनु दाहाललाई जिताउन कांग्रेसले ठूलै मिहेनत गर्यो र जितायो पनि। मतपत्र च्यातेको विषयमा समेत कांग्रेस चुइक्क बोल्न सकेन। त्यसपछि २०७४ मंसिरमा भएको प्रतिनिधि सभाको निर्वाचनमा भने माओवादी केन्द्रले एमालेसँग बाम गठबन्धन गर्यो। चितवन निर्वाचन क्षेत्र ३ बाट प्रचण्ड विजयी बने। त्यतिबेला कांग्रेसीहरू माओवादी अध्यक्ष प्रचण्ड र आफ्नै पार्टीको केन्द्रीय नेतृत्वप्रति रुष्ट बनेका थिए।
अबको चुनावमा माओवादी केन्द्रसँग गठबन्धन नगर्ने कांग्रेसको संस्थापन इतरले भन्दै आएको छ। सोही कारण पनि प्रचण्ड झस्किएका हुन सक्छन्। यद्यपि अबको चुनाव पनि चितवनबाटै लड्ने प्रचण्डले बताएका छन्।
आफू डराउने खालको मान्छे नभएको भन्दै उनले अबको चुनावमा चितवन राजनीतिको कुरुक्षेत्र बन्ने बताएका छन्। २०७४ सालको स्थानीय तहको निर्वाचनमा चितवनका ९८ वटा वडाहरूमध्ये माओवादी केन्द्रले सात वटा वडामा मात्रै जितेको थियो। एमालेले ५६ र कांग्रेसले ३५ वडामा जित हात पारेको हो।
.png)
.jpg)
