रुपन्देहीमा थप दुई कोरोना भाइरस संक्रमितको मृत्यु भएको छ।
लुम्बिनी प्रादेशिक अस्पताल अन्तर्गत बुटवल धागो कारखानामा सञ्चालित कोरोना विशेष अस्थायी अस्पतालमा उपचाररत एक महिला र पुरुषको मृत्यु भएको सूचना अधिकारी डा. विष्णु गौतमले जानकारी दिए।
उनका अनुसार नवलपरासी प्रतापपुर गाउँपालिका २ की ३७ वर्षीया महिलाको शनिबार बिहान ६ बजे र बुटवल ११ का ४० वर्षीय पुरुषको गएराति ११ बजे मृत्यु भएको हाे।
बुटवलका पुरुष भदौ १५ गते र नवलपरासीकी महिला भदौ १७ गते अस्पतालमा भर्ना भएका थिए। उनीहरुको भेन्टिलेटरको सहायतामा आइसियूमा उपचार भइरहेको थियो। दुवैमा ज्वरो र श्वास प्रश्वासको समस्या रहेको डा. गौतमले बताए।
योसँगै रुपन्देही जिल्लामा कोरोनाबाट मृत्यु हुनेको संख्या १५ पुगेको छ। बुटवल उपमहानगरका मात्रै ६ जनाको ज्यान गएको छ।
