रुपन्देहीको देवदहमा क्वारेन्टाइनमा सुरक्षा गार्ड बसेका एक युवाले आफैंमाथि आगो लगाएर आत्मदाहको प्रयास गरेका छन्।

इलाका प्रहरी कार्यालय बुटवलका अनुसार देवदह नगरपालिका वडा नम्बर ७ शित्तलनगर स्थित क्वाारेन्टिनमा सुरक्षा गार्ड बसेका स्थानीय २४ वर्षका विपिन बस्यालले शरीरमा मट्टीतेल खन्याएर आगो लगाएका हुन्।

आत्मदाहको प्रयास गरेका युवाको अवस्था गम्भीर रहेको र उनको देवदह मेडिकल कलेजमा उपचार भइरहेको इलाका प्रहरी कार्यालय बुटवलका डीएसपी प्रतितसिंह राठौरले जानकारी दिए।

प्रहरीका अनुसार ती युवाले राति करिब ३ बजे आफ्नै शरीरमा मट्टीतेल खन्याएर आत्मदाहको प्रयास गरेका थिए।

देवदह वडा नम्बर ५ मितेरीटोल घर भएका विपिन कोरोना महामारी फैलिएसगै वडा नम्बर ७ शित्तलनगर स्थित मगर संघको भवनमा बनाइएको क्वारेन्टिनमा काम गर्दै आएका थिए।

प्रहरीले घटनाबारे अनुसन्धान भइरहेको जनाएको छ।