निरन्तरको बर्षापछि कैलालीमा करिब तीन सय घर बस्ती डुबानमा परेका छन्। 

अविरल वर्षाका कारण विभिन्न नदीमा पानीको सतह बढेरपछि जिल्लाका भजनी नगरपालिका र जोशीपुर गाउँपालिकाका बर्दगोरिया गाउँपालिका र टीकापुर नगरपालिकामा डुबानमा परेकाे जिल्ला प्रहरी कार्यालयले जनाएको छ।

प्रहरीका अनुसार वर्षापछिको बाढीले भजनी नगरपालिकामा मात्रै १ सय २० भन्दा बढी घर डुबानमा परेका छन्। वडा नम्बर ५ जबलपुर गाउँका ६० बढी घर डुबानमा परेको छ।

यसैगरी भजनी नगरपालिका २ र ३ काे मोहनपुर, ढुसी र काँढा गाउँमा काँढा नदीको बाढी पसेर करिब ७० भन्दा बढी घर डुबानमा परेकाे जिल्ला प्रहरी कार्यालयका प्रहरी नायब उपरीक्षक प्रतीक विष्टले जानकारी दिए।

यस्तै, जोशीपुर गाउँपालिका ३ स्थित फरिया गाउँमा काँढा नदीको बाढी पसेर ३५ घर र वडा नम्बर ४ स्थित झबही गाउँको खैरेनी टोलमा पथरैया नदीको बाढी पसेर सात घर डुबानमा परेका छन्। वडा नम्बर ५ बनकट्टामा २५ भन्दा बढी घर डुबानमा परेको छ।

जोखिम बढेपछि पीडितलाई सुरक्षित स्थानमा सारिएको उपरीक्षक प्रतीक विष्टले बताए।

वर्षाका कारण कर्णाली, मोहना, पथरैया, काँढा, कान्द्रा, घुरहा, खुटिया, कटैनीलगायतका सबै नदी र खोलानालामा बाढी आएको छ।