दाङमा जीप दुर्घटना हुँदा एक जनाको मृत्यु भएकाे छ भने चार जना घाइते भएका छन्। बिहीबार कृष्णनगरबाट तुलसीपुर जाँदै गरेको रा १ च ९६२ नम्बरको बोलेरो जीप घोराही–लमही सडकखण्डअन्तर्गत घोराही उपमहानगरपालिका–३ मसोटमा दुर्घटना भएको हाे। 

दुर्घटनामा जीपमा सवार तुलसीपुर उपमहानगरपालिका १५ का १६ वर्षीय पदम वलीको मृत्यु भएको प्रहरीले बताएकाे छ। दुर्घटनामा घाइते भएका वलीको उपचारका क्रममा राप्ती स्वास्थ्य विज्ञान प्रतिष्ठान घोराहीमा मृत्यु भएको जिल्ला प्रहरी प्रवक्ता डीएसपी सुमित खड्काले जानकारी दिए।

दुर्घटनामा चालक तुलसीपुर १५ का ३८ वर्षीय भीमबहादुर वली, यात्रुहरु तुलसीपुर १५ कै २६ वर्षीय देवराज वली, १७ वर्षीय विशाल वली र २४ वर्षीय गोपाल श्रेष्ठ घाइते भएका छन्।

 घाइतेहरुको प्रतिष्ठानमा उपचार भइरहेको छ।