भारतमा कोरोना भाइरस (काेभिड–१९)का कारण ज्यान गुमाउनेकाे संख्या १८ हजारको नाघेकाे छ।
भारतीय स्वास्थ्य मन्त्रालयका अनुसार भारतमा बिहीबारमात्रै ३ सय ७९ जनाकाे काेभिड–१९ का कारण मृत्यु भएकाे छ।
गएको सात दिनमा झन्डै ३ हजार मानिसले ज्यान गुमाएका हुन्।
त्यसैगरी बिहीबार एकै दिन भारतमा २२ हजार भन्दा धेरै नयाँ काेराेना भाइरसका संक्रमित थपिएका छन्।
भारतको महाराष्ट्रमा ६ हजार ३ सय ३० जनामा काेराेना संक्रमण पुष्टि भएकाे छ।
यता तामिल नाडूमा ४ हजार ३ सय ४३ जनमा काेराेना भेटिँदा कर्नाटकमा १५ सय २ जना संक्रमित थपिएका छन्।
यस्तै तेलङ्गनामा १२ सय १३ जना नयाँ संक्रमित थपिएका छन्।
यता उत्तर प्रदेशमा एकै दिन ८ सय १७ नयाँ काेराेना संक्रमित थपिएका छन्। बिहारमा ४ सय ७८ जनामा संक्रमण देखिएकाे छ।
यस्तै पश्चिम बंगालमा ६ सय ४९ काेराेना संक्रमित थपिएका छन्। असाममा ४ सय ८ नयाँ संक्रमित थपिएका छन्।
याेसँगै भारतमा हिजो साँझसम्म कोरोना संक्रमितको संख्या ६ लाख २७ हजार २३ पुगेको छ।
