सन् २००८ मा रिलिज भएको हिन्दी फिल्म ‘जाने तु या जाने ना’ मा एउटा गीत छ, ‘पप्पु कान्ट डान्स साला ।’ फिल्मको एक पात्र पप्पु धनी छ तर उसको समस्या भनेको उसलाई नाच्न आउँदैन र पार्टीहरुमा एक्लोजस्तै हुन्छ ।
हिन्दी सिनेमाको पप्पु र नेपालमा चलेका पप्पु भने फरक पात्र हुन् । उताको पप्पुलाई नाच्न आउँदैन तर यताको पप्पुलाई भने नाच्न पनि आउँछ, सत्तामा रहेकाहरुलाई नचाउन पनि आउँछ । तर, पप्पुले पहिले जति नाचे, नचाए पनि अब भने नाच्न नपाउने भएका छन् ।
नेपालको पप्पु भनेको चाहिँ पप्पु कन्स्ट्रक्सन हो र यसका मालिक हुन् निलम्बित सांसद् हरिनारायण रौनियार ।
सार्वजनिक खरिद नियमावलीको छैटौँ संशोधनले पप्पु कन्स्ट्रक्सनको कामलाई अब करिब–करिब बन्देज लगाइदिएको छ, जसका कारण सडक र पुल निर्माणमा एकछत्र राज गरेर आफू पनि नाच्ने र सरकार तथा जनतालाई समेत नचाउने यिनै पप्पु अब नाच्न र नचाउन नसक्ने अवस्थामा पुगेका छन् ।
