सात सय वर्षअघि। जब नेपालको वास्तुकलाबाट प्रभावित भएर चीनका एक बादशाहले एक सय कालिगड मगाएका थिए। पछि अरनिको नामले प्रसिद्धि पाएका त्यतिबेलाका १७ वर्षे युवक बलबाहु ८० जना कालिगडको नेतृत्व गर्दै चीन गएका थिए। 

उनै बलबाहुलाई विदाइ गर्दाको त्यो क्षण कस्तो थियो?  

इतिहासमा रुचि राख्नेहरूलाई यो जिज्ञासा हुनसक्छ। मानिसहरूको खँदिलो भीड, वरिपरीका कला कौशल अर्थात् त्यसबेलाका ऐतिहासिक दृश्य। वरिष्ठ चित्रकार हरि प्रसाद शर्माको पेन्टिङ कलाले इतिहासको उही दुर्लभ दृश्य झल्काएको छ। 

आर्ट काउन्सिलस्थित एकल चित्रकला प्रदर्शनीमा राखिए मध्येको एक चित्र हो यो। ७ सय वर्षअघिको पूर्वधार, सामाजिक तथा सांस्कृतिक परिवेश र जीवनशैलीलाई ८२ वर्षीय शर्माको चित्रले जीवन्त बनाएको छ। 

प्रदर्शनीमा ४५ वटा चित्र राखिएका छन्। 

प्रदर्शनीमा राखिएका पेन्टिङले तीन कुरा दर्शाउँछन्- संस्कृति, जीवनशैली र इतिहास। इतिहासका पेन्टिङहरू कालखण्डका हिसाबले क्रमबद्ध राखिएका छन्। राजा अशोकाको लुम्बिनी भ्रमण, मल्लकालीन समयका राजाहरूको जीवनशैली, पृथ्वीनारायण शाहले थालेको नेपाल एकीकरणको घटना लगायत जंगबहादुर राणाको ऐतिहासिक क्षणलाई शर्माले चित्रमा उतारेका छन्।